جاس وسپىرىمدەر وليمپياداسىندا قازاقستان تۋىن كىمدەر الىپ شىعادى

وڭتۇستىك كورەيانىڭ كانۆون قالاسىندا وتەتىن IV قىسقى جاس وسپىرىمدەر وليمپياداسىندا قازاقستان مەملەكەتتىك تۋىن الىپ شىعاتىن اتلەتتەردىڭ ەسىمدەرى بەلگىلى بولدى، دەپ حابارلايدى Kazinform.

ق ر ۇلتتىق وليمپيادالىق كوميتەتى ءمالىم ەتكەندەي، IV قىسقى جاس وسپىرىمدەر وليمپياداسىندا قازاقستان تۋىن باتىس قازاقستان جانە سولتۇستىك قازاقستان وبلىستارىنىڭ سپورتشىلارى الىپ شىعاتىن بولادى.

اتاپ ايتساق، «ۇلتتار شەرۋى» كەزىندە قازاقستان تۋىن كونكيمەن جۇگىرۋدەن پەتروپاۆلدان ۇلتتىق قۇرامانىڭ مۇشەسى كريستينا شۋمەكوۆا مەن ورالدىق شورت-ترەكشى ەراسىل شىڭعىسحان الىپ شىعادى.

«بۇل مەن ءۇشىن كەرەمەت قوبالجيتىن ءسات. قىسقى وليمپيادا ويىندارىندا قازاقستان اتىنان ونەر كورسەتۋ - ابىروي عانا ەمەس، ۇلكەن جاۋاپكەرشىلىك. مەن مۇز ايدىنىندا بار كۇشىمدى سالامىن دەپ ۋادە بەرەمىن. ءارقايسىمىز وليمپيادا جۇلدەسىن الۋدى ارماندايمىز جانە بۇل ويىندار - بۇل ماقساتقا جەتۋگە مۇمكىندىك»، - دەپ ءبولىستى كريستينا شۋمەكوۆا.

ال ءوز كەزەگىندە شورت-ترەكتەن قازاقستان ۇلتتىق قۇراماسىنىڭ مۇشەسى ەراسىل شىڭعىسحان دا ءوز ەموتسيالارىمەن ءبولىستى.

«مەن ءۇشىن كانۆوندا ەلىمىزدىڭ ۇلتتىق قۇراماسىنىڭ تۋىن الىپ شىعۋ - ۇلكەن جاۋاپكەرشىلىك. ءبىزدىڭ كوماندا الداعى جارىستارعا دايىن، مەن قازاقستاندى لايىقتى تۇردە كورسەتە الاتىنىمىزعا سەنىمدىمىن. جاس وسپىرىمدەر وليمپياداسىنا قاتىسۋ - ءبىزدىڭ ءارقايسىمىز ءۇشىن ماڭىزدى تاجىريبە، كاسىبي ءوسۋىمىزدىڭ ءبىر بولىگى»، - دەدى سپورتشى.

ايتا كەتەيىك، كانۆون-2024 جاس وسپىرىمدەر اراسىنداعى IV قىسقى وليمپيادا ويىندارى 19- قاڭتاردا اشىلادى جانە 1- اقپانعا دەيىن پحەنچحان 2018 قىسقى وليمپيادا ويىندارىن قابىلداعان وڭتۇستىك كورەيانىڭ كانۆون پروۆينتسياسىندا وتەدى. وڭتۇستىك كورەياداعى جاس وسپىرىمدەر وليمپيادا ويىندارىنا الەمنىڭ 50 ەلىنەن 1800 سپورتشى قاتىسادى دەپ جوسپارلانعان. جەتى سپورت تۇرىنەن (15 ءپان) 81 مەدال جيىنتىعى ويناتىلادى. قازاقستاننىڭ سپورت دەلەگاتسياسى قۇرامىندا سپورتتىڭ بەس تۇرىنەن 42 سپورتشى بار.

قازاقستان جاس وسپىرىمدەر اراسىنداعى قىسقى وليمپيادا ويىندارىنا 2012-جىلدان بەرى قاتىسىپ كەلەدى. جالپى، ەلىمىز ءۇش قىسقى جاس وسپىرىمدەر وليمپيادا ويىندارىنا قاتىسىپ، ەكى كۇمىس جانە التى قولا مەدال جەڭىپ الدى.

اۆتور كۇنسۇلتان وتارباي