جاس وسپىرىمدەر وليمپياداسىنا قازاقستاننان قانشا ادام بارادى

ق ر ۇلتتىق وليمپيادالىق كوميتەتى 2024-جىلدىڭ 19- قاڭتارى مەن 1- اقپانى ارالىعىندا وڭتۇستىك كورەيانىڭ كاننىن قالاسىندا وتەتىن جاس وسپىرىمدەردىڭ IV قىسقى وليمپياداسىنا ەل قۇراماسى قانشا جولداما العانىن جاريالادى، دەپ حابارلايدى kazinform.

اتالعان كوميتەت اتاپ وتكەندەي، قازاقستاندىق سپورتشىلار جارىسقا قارقىندى دايىندالىپ جاتىر.

«قازىرگى تاڭدا قازاقستان جاس وسپىرىمدەر قۇراماسىنىڭ قورجىنىندا بياتلون، كونكيمەن جۇگىرۋ، شورت-ترەك، كەرلينگ، شايبالى حوككەي، شاڭعى جارىسى، شاڭعىمەن ترامپليننەن سەكىرۋ، شاڭعى قوسسايىسى، تاۋ شاڭعىسى، فريستايل، پاراللەل موگۋل تۇرىنەن 30 جولداما بار»، - دەلىنگەن حابارلامادا.

سونداي-اق، جولداما سانى ءالى دە تولىعۋى مۇمكىن ەكەنىن دە اتاپ وتكەن. سەبەبى، جاس وسپىرىمدەر وليمپياداسىنا ليتسەنزيا بەرەتىن جارىستار ءالى اياقتالماعان.

ايتا كەتەيىك، IV قىسقى جاس وسپىرىمدەر وليمپياداسىنىڭ اشىلۋ سالتاناتى 2024-جىلدىڭ 19- قاڭتارىندا كاننىنداعى Gangneuung Oval سپورت كەشەنىندە وتسە، ويىنداردىڭ جابىلۋ سالتاناتى 2024-جىلدىڭ 1-اقپانىندا Gangneung Olympic Park سپورت كەشەنىندە ۇيىمداستىرىلادى، دەپ جوسپارلانعان.

ال جالپى اتالعان وليمپياداعا جەر-جاھاننىڭ 70 ەلىنەن كەلەتىن 1800 (950 ۇل، 950 قىز) سپورتشى قاتىسادى دەپ كۇتىلۋدە. سپورتتىڭ 7 تۇرىنەن 15 ديستسيپلينا بويىنشا 81 مەدال جيىنتىعى ساراپقا سالىنادى.

جاس وسپىرىمدەر وليمپياداسى وسىمەن ءتورتىنشى رەت وتكەلى وتىر.

اۆتور كۇنسۇلتان وتارباي