جاس وسپىرىمدەر وليمپياداسى: قورجىنىمىزدا قانشا جولداما بار

قازاقستاندىق سپورتشىلار 2024-جىلدىڭ 19- قاڭتارى مەن 1- اقپانى ارالىعىندا وڭتۇستىك كورەيانىڭ كانۆوندو پروۆينتسياسىنداعى كاننىن قالاسىندا جالاۋى جەلبىرەيتىن IV قىسقى جاس وسپىرىمدەر وليمپياداسىنا قازىرگە دەيىن قانشا جولداما الىپ ۇلگەرگەنى بەلگىلى بولدى، دەپ حابارلايدى Kazinform.

ق ر تۋريزم جانە سپورت مينيسترلىگىنىڭ باسپا ءسوز قىزمەتى تاراتقان مالىمەتكە كوز جىبەرسەك، كانۆوندوداعى IV قىسقى جاس وسپىرىمدەر وليمپياداسىنا قازاقستان جاس وسپىرىمدەر قۇراماسىنىڭ قورجىنىندا ازىرگە سپورتتىڭ 5 تۇرىنەن (بياتلون، كونكيمەن جۇگىرۋ، شورت-ترەك، كەرلينگ، شايبالى حوككەي) 17 جولداما بار. الداعى ۋاقىتتا ليتسەنزيالار سانى تاعى دا تولىعادى دەپ كۇتىلۋدە.

ال جالپى اتالعان وليمپياداعا جەر-جاھاننىڭ 70 ەلىنەن كەلەتىن 1800 (950 ۇل، 950 قىز) سپورتشى قاتىسادى دەپ كۇتىلۋدە. سپورتتىڭ 7 تۇرىنەن 15 ديستسيپلينا بويىنشا 81 مەدال جيىنتىعى ساراپقا سالىنادى.

ايتا كەتەيىك، IV قىسقى جاس وسپىرىمدەر وليمپياداسىنىڭ اشىلۋ سالتاناتى 2024-جىلدىڭ 19- قاڭتارىندا كاننىنداعى «Gangneuung Oval» سپورت كەشەنىندە وتسە، ويىنداردىڭ جابىلۋ سالتاناتى 2024-جىلدىڭ 1- اقپانىندا «Gangneung Olympic Park» سپورت كەشەنىندە ۇيىمداستىرىلادى دەپ جوسپارلانعان.

ەستەرىڭىزگە سالا كەتەيىك، وسىعان دەيىن جاس وسپىرىمدەر قىسقى وليمپياداسى وتەتىن كانۆوندو قالاسى تۋريستەردى نەسىمەن قىزىقتىراتىنى تۋرالى جازعان بولاتىنبىز.

اۆتور كۇنسۇلتان وتارباي