«Jas Otan» اتاۋىن وزگەرتە مە - نۇرجان جەتپىسبايەۆ جاۋاپ بەردى
«وزدەرىڭىزگە بەلگىلى، «Nur Otan» - نىڭ كەزەكتەن تىس وتكەن سەزىندە پارتيا اتاۋىن اۋىستىرۋ تۋرالى ۇسىنىس ايتىلىپ، مەملەكەت باسشىسى- پارتيا ءتوراعاسى قاسىم-جومارت كەمەل ۇلى «Amanat» بولىپ وزگەرۋىن قولدادى. بۇل جاي عانا اتاۋدىڭ وزگەرۋى ەمەس، تولىقتاي جۇمىستىڭ جاڭارۋى، جاڭعىرۋى دەپ بىلەمىن. ال «Jas Otan» - عا كەلەر بولساق، وسىعان بايلانىستى بىزگە ەلىمىزدىڭ تۇكپىر-تۇكپىرىنەن ءتۇرلى ۇسىنىستار تۇسۋدە. بەس ساۋساق بىردەي ەمەس قوي، سول سياقتى جاس وتاندىقتاردىڭ ءبىر بولىگى اتىن اۋىستىرايىق دەسە، ەكىنشىسى بۇرىنعى اتاۋ قالسىن دەگەن پىكىردە. جاستاردىڭ پىكىرىن ەلەپ- ەسكەرۋ ءبىز ءۇشىن ءبىرىنشى ورىندا. سوندىقتان، بارلىق ۇسىنىستارمەن تۇبەگەيلى تانىسىپ، وقي كەلە ناقتى شەشىمگە كەلەتىن بولامىز. بۇل تۋرالى الداعى ۋاقىتتا وتەتىن «Jas Otan» - نىڭ فورۋمىندا جاريالايمىز دەپ جوسپارلاپ وتىرمىز»، - دەدى «Jas Otan» جاستار قاناتىنىڭ ءتوراعاسى.
سونداي-اق ول جاستار قاناتىنىڭ قاتارىن جاڭارتىپ، تولىقتىرۋ بويىنشا ءبىرقاتار جۇمىس اتقارىلىپ جاتقانىن اتادى.
«قاتارىمىزدى جاستاردىڭ اراسىندا كوش باستاپ جۇرگەن، وزىندىك قوعامدىق پىكىرگە يە، ايرىقشا پوتەنتسيالدى ادامدارمەن تولىقتاراتىن بولامىز. اۋىل جاستارىن جانە الەۋمەتتەندىرۋدى قاجەت ەتەتىن جاستاردى تارتۋ - باستى مىندەتتەردىڭ ءبىرى دەسەم قاتەلەسپەيمىن. مەملەكەتتىك جاستار ساياساتى تۋرالى زاڭنىڭ كۇشى مەن ارەكەت ەتۋ اۋقىمىنىڭ تار ەكەنى بۇرىننان ءمالىم. الايدا جاستاردىڭ تاراپىنان بۇل ماسەلەنى شەشۋگە قاتىستى ۇسىنىستار ەسكەرىلمەي جاتقانى دا داۋسىز. جاھاندانۋ جاعدايىندا جاستارىمىزدىڭ دامىپ جەتىلۋىنە، ۋاقىتىن دۇرىس ۇيىمداستىرىپ، پوتەنتسيالىن دۇرىس ارناعا باعىتتاماساق، ءبىز ولاردى جوعالتىپ الۋىمىز ابدەن مۇمكىن. ال وزگەرىستەر كەزەڭىندە جاڭا كادرلار، ءوز ءىسىنىڭ جاس ماماندارى، ەلىمىزدىڭ ەرتەڭىن سەنىپ تاپسىرا الاتىن كوشباسشىلاردى تاربيەلەۋ ەرەكشە ماڭىزعا يە»، - دەدى نۇرجان جەتپىسبايەۆ.
ەسكە سالايىق، 1- ناۋرىز كۇنى وتكەن سەز بارىسىندا «Nur Otan» پارتياسىنىڭ اتاۋىن «Amanat» دەپ وزگەرتۋ تۋرالى شەشىم قابىلداندى. بۇگىن «Amanat» پارتياسى قايتا تىركەۋدەن وتكەنى ءمالىم ەتىلدى.
