جاس عالىمدارعا بايقاۋلار ارقىلى بەرىلەتىن گرانتتىڭ قارجى كولەمىن ارتتىرۋ كەرەك - پرەزيدەنت

استانا. KAZINFORM - اقوردادا ءوتىپ جاتقان عىلىم جانە تەحنولوگيالار جونىندەگى ۇلتتىق كەڭەستىڭ وتىرىسىندا مەملەكەت باسشىسى قاسىم-جومارت توقايەۆ عىلىمنىڭ كادرلىق الەۋەتىن نىعايتۋ ماسەلەسى تۋرالى ايتتى.

پرەزيدەنتتىڭ سوزىنشە، بۇگىنگى تاڭدا ەكونوميكانىڭ ماڭىزدى سالالارى بويىنشا كاسىبي ماماندار دايارلاۋ جۇمىسىن كۇشەيتۋ كەرەك.

«عىلىمي جاڭالىقتىڭ ءبارى عالىمداردىڭ تىنىمسىز ەڭبەگىنىڭ ناتيجەسى ەكەنى ءسوزسىز. كەز كەلگەن جەتىستىك، ەڭ اۋەلى، ادامعا، ياعني ادام كاپيتالىنا تىكەلەي بايلانىستى. سوندىقتان جاس عالىمداردى جان-جاقتى قولداۋ قاجەت. گرانت ارقىلى جۇزەگە اسىرىلاتىن جوبالاردىڭ ۇشتەن ءبىرى جاس عالىمدارعا تيەسىلى. ارينە، مۇنداي جوبالاردىڭ سانىنان گورى، ساپاسى ماڭىزدى. جىل سايىن جاس عالىمدارعا بايقاۋلار ارقىلى بەرىلەتىن گرانتتىڭ قارجى كولەمىن ارتتىرۋ كەرەك. قازىر جاس عالىمدارىمىز الەمدەگى جەتەكشى زەرتتەۋ ورتالىقتارىندا ستاجيروۆكادان وتە الادى. بۇل - جاقسى ءۇردىس. ونى جالعاستىرا بەرۋ قاجەت. مەنىڭ تاپسىرماممەن جۇزەگە اسىرىلىپ جاتقان «جاس عالىم» باعدارلاماسىنىڭ ءتيىمدى ەكەنىن كورىپ وتىرمىز. ونىڭ اۋقىمىن كەڭەيتۋ كەرەك. ياعني وعان عىلىمي ينستيتۋتتاردا جانە ۇيىمداردا جۇمىس ىستەيتىن جاس مامانداردى قوسۋعا بولادى»، - دەدى پرەزيدەنت.

سونداي-اق مەملەكەت باسشىسى عالىمدارعا دوكتورانتۋرادان كەيىن شەتەلدە تاعىلىمدامادان وتۋگە مۇمكىندىك بەرۋ قاجەتتىگىنە توقتالدى.

«ولاردىڭ زەرتتەۋ جۇمىسىمەن الاڭسىز اينالىسۋىنا جاعداي جاساۋ كەرەك. عالىمدار لايىقتى ستيپەنديا الۋعا ءتيىس. شەتەلدە تاجىريبەدەن وتكەن ازاماتتاردىڭ ىشىندە دوكتورانتتاردىڭ ۇلەسى - نەبارى 1,6 پايىز. بۇل - وتە از. ۇكىمەت ولاردىڭ قاتارىن كوبەيتۋ ءۇشىن ناقتى شارالار قابىلداۋى قاجەت. ەلىمىزدىڭ وقۋ ورىندارىندا ءبىلىم الىپ جۇرگەن ازاماتتاردىڭ اراسىندا دا دوكتورانتتاردىڭ ۇلەسى تومەن. مەن بىلتىر دوكتورانتۋراعا جىل سايىن 5 مىڭ ادامعا دەيىن قابىلداۋ تۋرالى تاپسىرما بەردىم. ول ءۇشىن تىڭ تاسىلدەر كەرەك. PhD- ءدى عىلىمي الەۋەتى زور جانە تەرەڭ زەرتتەۋ جۇرگىزە الاتىن ءبىلىم وردالارى دايارلاۋعا ءتيىس. ۇكىمەت ماگيستراتۋرا جانە دوكتورانتۋرا باعدارلاماسىنا ارنالعان گرانتتىڭ قۇنىن ارتتىرۋ قاجەت. بىلىكتى مامانداردى ىرىكتەۋ، دايارلاۋ جانە ولاردىڭ عىلىم سالاسىندا قالۋىنا جاعداي جاساۋ - وتە ماڭىزدى ماسەلە. گرانت سانىن ارتتىرىپ، ونىڭ قۇنىن كوتەرگەن كەزدە وسى ماسەلەگە باسا ءمان بەرۋ كەرەك»، - دەدى قاسىم-جومارت توقايەۆ.

ول كەلتىرگەن مالىمەتتەرگە قاراعاندا، الدىڭعى جىلى ءبىر جارىم مىڭنان استام دوكتورانتتىڭ نەبارى 38 پايىزى ديسسەرتاتسيا قورعاعان. ولاردىڭ جارتىسىنا جۋىعى عانا عىلىم سالاسىندا قالدى.

«عىلىم دوكتورلارىن دايىنداۋعا وراسان زور قارجى جۇمسالعانىن ەسكەرسەك، بۇل كورسەتكىش ءالى دە تومەن. بۇل ماسەلەنى تىڭعىلىقتى زەردەلەپ، احۋالدى تۇزەۋ ءۇشىن قاجەتتى شارا قابىلداۋدى تاپسىرامىن»، - دەدى قاسىم-جومارت توقايەۆ.