جاس عالىم سۋ استى الەمىن زەرتتەۋگە ارنالعان دروننىڭ پروتوتيپىن جاسادى

  ساتبايەۆ ۋنيۆەرسيتەتىنىڭ جاس عالىمى سۋ استى الەمىن زەرتتەۋگە ارنالعان دروننىڭ پروتوتيپىن جاسادى. تەڭىز بەن كولگە تەرەڭىنەن سۇڭگيتىن درون قازىر ۋنيۆەرسيتەت جانىنداعى اۆتوماتيكا جانە اقپاراتتىق تەحنولوگيالار ينستيتۋتىنىڭ زەرتحاناسىندا سىناقتان ءوتىپ جاتىر.

ينجەنەر ەرمۇحامەد كالمەنوۆتىڭ قولىنان شىققان ونەرتابىس الداعى جىلى كوممەرتسيالىق جوبا رەتىندە كاسىپكەرلەرگە ۇسىنىلادى. درون سۋ استىن تاسپالاپ، تەڭىز بەن كولدىڭ بيوسفەراسىن زەرتتەپ، تاعاننىڭ قارتاسىن جاساي الادى، - دەيدى ەرمۇحامەد كالمەنوۆ. وعان قوسا سۋدىڭ لايلىلىعى، تەمپەراتۋراسى مەن قىسىمىن دا انىقتايدى. ال مانيپۋلياتور ورناتسا، سۋ استىنداعى قۇبىرلاردى دانەكەرلەۋگە دە قاۋقارلى ەكەن. زەرتحانالىق نۇسقاسى بولعاندىقتان، درون سانتەحنيكالىق قۇبىردان جاسالعان.

ەرمۇحامەد كالمەنوۆ، Satbayev University ءنىڭ اعا وقىتۋشىسى:

- بۇل - پروتوتيپ. وسى پروتوتيپتە ءبىزدىڭ قويىلعان گيپوتەزالاردى جانە ماقساتتارىمىزدى، سوسىن داتچيكتەرىمىزدى زەرتتەيمىز. تاعى دا باسقارۋ جۇيەسىن زەرتتەۋ ءۇشىن وسىنداي پروتيپتەردى قولدانامىز. ال سوڭعى نۇسقاسىنىڭ سىرتىن مەتالدان جاساپ، باسقا موتورلاردى قولدانامىز.

دروننىڭ ماقساتى - سۇڭگۋىر بارا المايتىن مىڭ مەترگە دەيىنگى تەرەڭدىكتە زەرتتەۋ جۇرگىزۋ. پروتوتيپ ازىرگە كابەلدىڭ ۇزىندىعىنا تاۋەلدى بولعىندىقتان، 35 مەترگە دەيىن تۇسە الادى. زەرتحانالىق تەكسەرىستەن كەيىن ىسكە جارامدى ۇلگىسىن جاساماق. ۋنيۆەرسيتەت باسشىلىعى ونەرتابىستى كاسىپكەرلەرگە وندىرىستىك جوبا رەتىندە ۇسىنباق.

ەرجان كولدەيەۆ، Satbayev University ءنىڭ پرورەكتورى:

- بۇل جۇمىسقا وندىرىستەن سۇرانىس بولىپ، وعان %20 تەن جوعارى قارجى قۇيادى. مەملەكەت تاراپىنان 350 ميلليون قۇيىلسا، ۇستىنە جاڭاعى 70 ميلليونداي بيزنەستى تارتۋعا سونداي شارتتارى بار جانە ءبىز ۋنيۆەرسيتەت وسىعان بارلىق جاعدايدى جاسايمىز. ۋنيۆەرسيتەت قابىرعاسىندا عالىمداردى ىنتالاندىرۋ ماقساتىندا ونەرتابىسقا جىل سايىن كونكۋرس جاريالانىپ تۇرادى ەكەن. بىلتىر 25 جوبا ءارقايسىسى 5 ميلليون تەڭگەگە دەيىن گرانت ۇتىپ العان. بيىلعى گرانت سانى 50 گە جەتىپتى. باستى ماقسات - جاس ونەرتاپقىشتاردى قولداۋ.

www.24.kz