جاس بالاعا الىمجەتتىك كورسەتكەن سەمەيلىك ءبىر توپ وقۋشى ۇستالدى
سەمەيدە ءبىر توپ جاس ءوسپىرىم مەكتەپ وقۋشىسىن سوققىعا جىقتى. قازىردە بۇزاقىلار ۇستالىپ، تەرگەپ-تەكسەرۋ امالدارى جۇرگىزىلۋدە. ال، اتا-انالارىنا ءتيىستى شارالار قولدانىلادى، دەپ حابارلايدى Baq.kz.
كۇنى كەشە الەۋمەتتىك جەلىدەگى پاراقشالاردا سەمەيلىك وقۋشىلاردىڭ بۇزاقىلىق ارەكەتتەرى تۇسىرىلگەن ۆيدەو تاراعان ەدى. بەلگىلى بولعانداي سەمەي قالاسى ءبىلىم ءبولىمىنىڭ «№9 جالپى ورتا ءبىلىم بەرەتىن مەكتەبىنىڭ» 6-7- سىنىپ وقۋشىلارى 4- سىنىپ وقۋشىسىنا قىسىم كورسەتكەن. اتالعان جاعدايعا قاتىستى قىلمىستىق ءىس قوزعالعان. الىمجەتتىك كورسەتكەن وقۋشىلار ۇستالىپ، ەسەپكە الىندى. ال ولاردىڭ اتا-انالارىنا قاتىستى ءتيىستى شارالار قولدانىلماق.
وسى فاكتى بويىنشا قىلمىستىق ءىس قوزعالدى. جانجالدىڭ بارلىق قاتىسۋشىلارى جەدەل تۇردە ورناتىلىپ، اتا-انالارىمەن بىرگە پوليتسيا بولىمىنە جەتكىزىلدى. جاسوسپىرىمدەر پوليتسيا بولىمىندە ەسەپكە قويىلادى. ولاردىڭ ءتارتىبىن كامەلەتكە تولماعانداردىڭ قۇقىقتارىن قورعاۋ جونىندەگى وبلىستىق كوميسسيا قارايدى. اتا-انالار بالالارىنىڭ تاربيەسىنە قاتىستى مىندەتتەرىن تيىسىنشە ورىنداماعانى ءۇشىن قاتاڭ جاۋاپكەرشىلىككە تارتىلادى. وقۋ ورنى اكىمشىلىگىنە وقيعاعا سەبەپ بولعان جاعدايلار مەن سەبەپتەردى جويۋ تۋرالى ۇسىنىس ەنگىزىلەدى، - دەدى اباي وبلىسىنىڭ پوليتسيا دەپارتامەنتىنىڭ باستىعىنىڭ ورىنباسارى ەرنار بازاروۆ.
قىلمىستىق جاعداي وبلىستىق پوليتسيا دەپارتامەنتىنىڭ نازارىندا. جابىرلەنۋشىگە سوت-مەديتسينالىق ساراپتاما جاسالىپ، پسيحولوگيالىق كومەك كورسەتىلۋدە. ساراپتاما ناتيجەلەرى شىققان سوڭ قوسىمشا مالىمەتتەر بەلگىلى بولماق. سونداي-اق اباي وبلىسىنىڭ ءبىلىم باسقارماسى ارنايى مونيتورينگتىك توپ قۇرىلعانىن حابارلادى. بۇل رەتتە ءبىلىم مەكەمەسىنە قىزمەتتىك تەكسەرىس جۇرگىزىلىپ، مەكتەپ باسشىلىعىنىڭ تاربيە جانە باقىلاۋ جۇمىستارىنداعى جاۋاپكەرشىلىگى قارالماق.
