جارىق پەن تاماق جوق: يزرايل گازانى تولىق وقشاۋلاعانىن مالىمدەدى
يزرايل قورعانىس ءمينيسترى يواۆ گاللانت گازانىڭ تولىق وقشاۋلانعانىن ءمالىم ەتتى. ول جاقتا قازىر جارىق، تاعام جانە وتىن جوق.

يزرايل حاماس لاڭكەستىك توبىمەن كۇرەسىپ جاتقاندىقتان قورعانىس ءمينيسترى وسىنداي بۇيرىق بەرگەنىن مالىمدەدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
«مەن گازا سەكتورىن تولىقتاي وقشاۋلاۋعا بۇيرىق بەردىم. جارىق، تاعام، وتىن دا بولمايدى، ءبارى جابىق»، - دەپ ءمالىم ەتتى گاللانت ساحال وڭتۇستىك قولباسشىلىعى بەەر- شيەۆتە جۇرگىزگەن باقىلاۋدان كەيىن.
يزرايل اسكەرى گازا سەكتورىندا قورشاۋعا الىنعان ەكى قاشقىندار لاگەرى - دجاباليا مەن اش- شاتيگە اۋەدەن سوققى جاسادى. ال- شاتي مەشىتى دە جارىلدى. جاراقات العان ونداعان ادام گازا قالاسىنداعى نەگىزگى اش- شيفا اۋرۋحاناسىنا جەتكىزىلدى.
سەنبى كۇنى پالەستينالىق حاماس توبى يزرايلگە شابۋىل جاساپ، ەل سوعىس جاعدايىنا كوشكەننەن كەيىن ءبىرقاتار مەملەكەت ازاماتتارىن يزرايلدەن ەۆاكۋاتسيالاۋدى ۇيىمداستىرعانىن ەسكە سالا كەتەيىك.
يزرايل اسكەرىنىڭ رەسمي وكىلى دۇيسەنبى تاڭەرتەڭ قازىرگى ۋاقىتتا بارلىق ەلدى مەكەندى باقىلاپ وتىرعانىن، يزرايل اۋماعىندا اسكەري ءىس- قيمىل بولىپ جاتپاعانىن ءمالىم ەتتى. دەگەنمەن ول يزرايل اۋماعىندا ءالى دە حاماس اسكەرى بولۋى مۇمكىن دەيدى.
بۇگىن حاماس تەل- اۆيۆتەگى اۋەجايعا زىمىران ۇشىرعانى بەلگىلى بولدى.