جارياسىز جاقسىلىق ولاردىڭ ءومىرىن وزگەرتتى
استانا. KAZINFORM - ناۋرىزدىڭ قىدىر اتاسى، يسلامنىڭ ءقادىر ءتۇنى، جاڭا جىلدىڭ اياز اتاسى. بۇل ۇعىمدار - مەرەكە مەن سالت- جورالعىنىڭ اتريبۋتى عانا ەمەس، عاسىرلار بويى ادامزاتقا ىزگىلىك دەيتىن سەزىمنىڭ بار ەكەنىن ۇمىتتىرماي، مەيىرىمنىڭ تامىرىنا قان جۇگىرتىپ وتىراتىن ساكرالدى دۇنيەگە اينالعان. جاسقا دا، جاسامىسقا دا ءۇمىت سىيلاي كەلەتىن جاڭا جىل قارساڭىندا جارياسىز جاسالعان جاقسىلىقتىڭ ارقاسىندا ءومىرى وزگە ارناعا بۇرىلعان ءۇش كەيىپكەردىڭ وقيعاسىن وقىرمان نازارىنا ۇسىنىپ وتىرمىز.
اتقۇمار ماقسات
ماقسات ەركەبايەۆتىڭ وقيعاسىن ا ق ش-تا جۇلدە العان «شەكتەۋسىز ءۇمىت» اتتى دەرەكتى فيلمنىڭ تانىستىرىلىمىندا العاش ەستىدىك.
فيلمگە ارقاۋ بولعان بەس كەيىپكەردىڭ ءبىرى - وسى ماقسات. سەرەبرالدى سال اۋرۋىمەن تۋعان بالانىڭ جاڭا جىل الدىندا تىلەگەن ارمانى ورىندالىپ، جىلقى تەراپياسىنا قول جەتكىزگەن. اناسى اقمارال سلاماوۆا سول ءبىر قۋانىشتى ءساتتى بىزگە قىسقاشا بايانداپ بەردى.
- 1,5 جاستان باستاپ ماقسات اينالاسىنداعى بۇكىل زاتتى، بۇكىل ادامدى «ات» دەپ اتادى. ءتىلى «ات» دەگەن سوزبەن شىقتى. بىلتىر بالامىز جاڭا جىلعا تىلەك جازعاندا اتتى جاقسى كورەتىنىن ايتىپتى. سول تىلەگى جەتسە كەرەك، شوتىنا 100 مىڭ تەڭگە ءتۇستى. بۇل - اكەسىنە قامشى بولدى. ۇستىنە ءوزى اقشا قوسىپ، بالامىزعا ات الىپ بەردىك. بىرنەشە اي بويى ايلىعىنان ارتىلعان اقشانى جيناپ، مال بازارىنان جۋاس ات ساتىپ الدى. قازىر ۇلىمىزدىڭ بوس ۋاقىتى اتتىڭ ۇستىندە ءوتىپ ءجۇر. ماقساتتىڭ ءوزى وعان تايبۋرىل دەپ ات قويدى. قازىر تايبۋرىلىنا ءمىنىپ، دوستارىنىڭ كومەگىمەن تاي كوكپاردا سالىم سالا باستادى، - دەيدى ول.
بوراندى كۇنى اۋىستىرىلعان بۇيرەك
14 جاستاعى انەل دنەكەشەۆانىڭ وقيعاسىن Kazinform بىلتىر جازعان. بالالىق شاعىنىڭ 2 جىل 4 ايىن ۇزدىكسىز اۋرۋحانادا وتكىزگەن ناۋقاس جاڭا جىلدىڭ شىرشا مەرەكەسىندە وزىنە جاڭا بۇيرەك تىلەيدى. سول تىلەگىنىڭ ورىندالعان ءساتى دە قىزىق. تۋرا ءبىر جىلدان كەيىن 30-جەلتوقساندا دونور تابىلادى. كۇتۋ پاراعىنا انەلدەن بۇرىن تىركەلگەن ناۋقاس كۇن رايىنىڭ كەسىرىنەن جەتە الماي، كەزەك تيەدى. 1980 -جىلعى مارقۇمنىڭ تۋىستارىنىڭ كەڭپەيىل نيەتىنىڭ ارقاسىندا 5 بىردەي ناۋقاس ءومىرىن ۇزارتۋعا مۇمكىندىك الادى. بوراندا ۇشاق ۇشپاي، پاۆلودارداعى دونوردىڭ اعزاسى استاناعا پويىزبەن 14 ساعاتتا جەتكىزىلەدى.
انەلدىڭ قازىرگى جاعدايىن ءبىلۋ ءۇشىن اناسىنا حابارلاسقانبىز. بىلتىر قىزىنىڭ سۋرەتى ب ا ق پەن الەۋمەتتىك جەلىدە تاراعاننان كەيىن قاتتى اۋىرعانىن ايتىپ، بۇل جولى سۋرەتىن جاريالاماۋىمىزدى ءوتىندى. انەل Kazinform ارقىلى قازاقستاندىقتارعا جاڭا جىلعا تىلەگىن جەتكىزۋىمىزدى وتىنگەن.
«سالەمەتسىزدەر مە؟ مەن، دنەكەشەۆا انەل، سىزدەرگە ءوز قولداۋىمدى جانە ءحالىمدى بىلدىرگىم كەلەدى. بۇيىرسا 31-جەلتوقساندا بۇيرەك اۋىستىرعانىما 1 جىل بولادى. قازىر مەندە ءبارى جاقسى، بۇيرەگىم جاقسى ىستەپ تۇر، اناليزدەرىم دە ويداعىداي. ءدارىنىڭ ءبارىن ۋاقىتىندا ءىشىپ ءجۇرمىن.
ماعان تىلەكشى بولعان بارشا جانعا العىسىم شەكسىز. سىزدەردى كەلە جاتقان 2025 -جىلان جىلىمەن قۇتتىقتايمىن! جاڭا جىلدا سىزدەرگە دەنساۋلىق، مول باقىت تىلەيمىن! قۋانىشتى كۇندەرىمىز كوپ بولسىن! ەم قابىلداپ جاتقان جاندارعا، شىدامدىلىق تىلەيمىن، اللادان ۇمىتتەرىڭىزدى ۇزبەۋلەرىڭىزدى سۇرايمىن. جاڭا جىلدا عاجايىپقا جانە قۋانىشقا تولى كۇندەرىڭىز كوپ بولسىن. ىزگى نيەتپەن انەل»، - دەپ جازادى قايسار قىز.
احمەت بايتۇرسىن ۇلىنىڭ جيەنى
احمەت بايتۇرسىن ۇلىنىڭ جيەنى ايمان بايسالوۆانىڭ جايسىز باسپانادا تۇرىپ جاتقانىن ەڭ العاش الاش ارداقتىسىنىڭ 150 جىلدىق مەرەيتويى قارساڭىندا Kazinform جازعان ەدى.
عالىمنىڭ ەڭبەكتەرى مەن شىعارمالارىن اكادەميالىق باسىلىمعا دايارلاعان توپتىڭ جەتەكشىسى، فيلولوگيا عىلىمدارىنىڭ دوكتورى ايگۇل ءىسماقوۆا رەداكسيامىزعا بەرگەن سۇحباتتا قازاقتىڭ قالتالى ازاماتتارىنا ۇندەۋ دە تاستاعان ەدى.
كەيىن ول ماسەلەنى Egemen Qazaqstan گازەتى كوتەردى. كۇزدە كوتەرىلگەن ماسەلە جەلتوقسان ايىندا شەشىمىن تاۋىپ، 17-جەلتوقساندا الماتىدان اقجولتاي حابار جەتتى. قايىرىمدى جاندار ۇلت ۇستازى ۇرپاعىنىڭ جاڭا پاتەرگە كىرۋىنە ىقپال ەتكەن بولاتىن. 2023 -جىلدىڭ قاڭتارىندا ايمان بايسالوۆا سۋ جاڭا باسپاناسىنا كىرىپ، احمەت اتاسىنا قۇران باعىشتاعانىن ەستىپ، قۋاندىق.
اسىلدىڭ سىنىعىنا سول ءۇيدىڭ قانشالىقتى جايلى باسپانا بولعانىن ءبىلۋ ءۇشىن قولىنداعى قىزى ارقىلى تەلەفونمەن تىلدەسكەنبىز. ايمان اپامىزدىڭ ءۇنى ەكى جىل بۇرىن الماتىدا جولىققان كەزدەگىدەن شارشاڭقى، باسەڭدەپ قالعانداي ەستىلدى. سويلەسە كەلىپ، ءۇنى باسەڭ تارتقانىمەن، كوڭىلى ويداعىداي ەكەنىنە كوز جەتكىزدىك.
- جاڭانىڭ اتى جاڭا ەمەس پە؟ بۇرىنعى پاتەرىمىز ەسكى ءارى ەڭ ۇستىڭگى قاباتتا بولعاندىقتان شاتىردان سۋ تاماتىن. مىنا پاتەر جىلى. اۋلاسى دا تىنىش. وڭشەڭ وتباسىلى ادامدار تۇرادى. تۋرا جانىمىزدا ءدارىحانا بار. قىزىم قولىما كەلگەن، بۇكىل كۇتىمىم سونىڭ موينىندا. يگىلىكتىڭ ەرتە-كەشى جوق. احمەت اتامنىڭ رۋحىن قۇرمەتتەپ، ۇرپاعى رەتىندە كومەك قولىن سوزعان، وسى پاتەردىڭ بەرىلۋىنە تىكەلەي سەبەپكەر بولعان پرەزيدەنت قاسىم-جومارت توقايەۆقا العىس ايتامىن. قازىر سول ادامعا ءوز بالامنىڭ تىلەۋىن تىلەگەندەي تىلەكشى بولىپ وتىرمىن، - دەيدى ايمان اپا.
ءبىز وقيعاسىن بايانداعان ءۇش ادام دا پرەزيدەنتتىڭ جارياسىز جاساعان جاقسىلىعىن كورگەن جاندار. بىرىنە تىكەلەي ءوز قولىمەن كومەك بەرسە، بىرىنە جىلى سوزىمەن دەمەۋ بولعان.
ال ەلىمىزدىڭ تۇكپىر-تۇكپىرىندە ەشكىمگە جار سالىپ، جاريا ەتپەي-اق، قولىنداعى از عانا دۇنيەسىن ءبولىسىپ، قامقورلىق جاساپ جۇرگەن وتانداسىمىز قانشاما؟ قازاق حالقىنىڭ بويىندا ءبىر-بىرىنە دەگەن قامقورلىعى، جالپى ادامزاتقا دەگەن مەيىرىمى جويىلماعانىن جىلدىڭ باسىنداعى تاسقىن كەزىندە ءوز ەركىمەن ەلگە كومەك قولىن سوزعان بەلسەندىلەر، كەشە عانا اقتاۋ تۇبىندە بولعان ۇشاق اپاتىنان كەيىن قان تاپسىرۋعا كەزەككە تۇرعان ماڭعىستاۋلىقتار تاعى ءبىر دالەلدەدى.
اۆتور
ەسىمجان ناقتىباي
