جاردەماقى ەسەپتەگەندە تۋىستار اراسىنداعى اقشا اۋدارىمى تابىسقا قوسىلا ما؟
استانا. قازاقپارات - 2027-جىلعى 1-قاڭتاردان باستاپ ەكىنشى دەڭگەيدەگى بانكتەر جاردەماقى الۋشىلاردىڭ بانك شوتتارى مەن دەپوزيتتەرى تۋرالى مالىمەتتەردى ەڭبەك جانە حالىقتى الەۋمەتتىك قورعاۋ مينيسترلىگىنە بەرەدى.
بۇل رەتتە وتباسى مۇشەلەرىنىڭ ءبىر-بىرىنە اۋدارعان اقشاسى تابىس رەتىندە ەسەپتەلمەيدى. بۇل تۋرالى ەڭبەك جانە حالىقتى الەۋمەتتىك قورعاۋ ۆيتسە-ءمينيسترى باحتيار جازىقبايەۆ ءتۇسىندىردى.
ۆيتسە-ءمينيستردىڭ ايتۋىنشا، وتباسىنىڭ ءال-اۋقاتىن باعالاۋ كەزىندە ءۇي شارۋاشىلىعىنىڭ كىرىس كوزدەرى ەسكەرىلەدى. ماسەلەن، اكەسى جالاقىسىن ءوز بانك كارتاسىنان ايەلىنە اۋدارىپ، ايەلى سول اقشانى بالاسىنا جىبەرسە، بۇل اۋدارىمدار وتباسىنىڭ قوسىمشا تابىسى رەتىندە ەسەپتەلمەيدى.
مۇنداي جاعدايدا وتباسى مۇشەلەرىنىڭ ءبىر ءۇي شارۋاشىلىعىنا جاتاتىنى ەسكەرىلەدى. ويتكەنى وتباسىنىڭ نەگىزگى كىرىس كوزى - اكەسىنىڭ جالاقىسى. اقشانى وتباسى مۇشەلەرىنىڭ اراسىندا اۋدارۋ جاڭا تابىس پايدا بولدى دەگەندى بىلدىرمەيدى.
ءبىر رەتتىك سىيلىق قالاي ەسەپتەلەدى؟
باحتيار جازىقبايەۆ ءبىر رەت اۋدارىلعان قوماقتى قاراجاتتىڭ دا تابىستى باعالاۋ كەزىندە قالاي ەسكەرىلەتىنىنە توقتالدى.
تابىستى ەسەپتەۋ كەزىندە ءبىر رەتتىك اۋدارىم عانا ەمەس، سوڭعى 12 ايدا قانشا اقشا تۇسكەنى ەسكەرىلەدى. ياعني، ءبىر ايدا بىرەۋ سىزگە 1 ميلليون تەڭگە سىيلاپ، ال قالعان ايلاردا ەشقانداي اقشا اۋدارماسا، بۇل قاراجاتتى تۇراقتى تابىس رەتىندە ەسەپتەۋ ءتارتىبى باسقاشا بولادى. جىلدىق ورتاشا تابىس ەسەپتەلەدى، - دەدى ۆيتسە-مينيستر.
وسىلايشا، وتباسىنىڭ ءال-اۋقاتىن باعالاۋ كەزىندە تەك ءبىر ايداعى تۇسىمگە ەمەس، سوڭعى 12 ايداعى اقشا قوزعالىسىنا نازار اۋدارىلادى.
