جاراقاتتان وليمپيادا التىنىنا دەيىنگى جول: ەلدوس سمەتوۆ جايلى كىتاپ جارىق كوردى
استانا. قازاقپارات - «Meloman Publishing» باسپاسىنان قازاقستاننىڭ ەڭ تانىمال ءارى داڭقتى سپورتشىلارىنىڭ ءبىرى - ەلدوس سمەتوۆ تۋرالى جازىلعان «ەلدوس سمەتوۆ. ءتوزىم. سەنىم. جەڭىس» اتتى كىتاپ جارىق كوردى. ءماتىن اۆتورى - ەسبول نۇراحمەت.
بۇل كىتاپ - قۇلاۋ مەن قايتا تۇرۋدىڭ، ءۇمىت پەن قايسارلىقتىڭ، اقىرىنا دەيىن جەتكەن جەڭىس جولى. بۇل جاي ءومىربايان ەمەس، قاراپايىم قازاق بالاسىنىڭ اسىل ارمانىنان باستاۋ الىپ، وليمپيادا التىنىنا جەتكىزگەن ءومىر جولى جايىنداعى شىنايى حيكايا. كىتاپتا ارمانعا ادالدىق، ءتارتىپ پەن ءتوزىم ارقاسىندا وليمپيادا تۇعىرىنا جەتكەن قازاق بالاسىنىڭ ءجۇرىپ وتكەن جولى باياندالعان.
ايگىلى دزيۋدوشى ەلدوس سمەتوۆتىڭ وليمپيادا مەدالدارىنىڭ تولىق جيىنتىعىن يەلەنۋى، الەم چەمپيوناتىنىڭ التىن تۇعىرى، جاراقاتتان كەيىنگى اۋىر ساتتەر مەن قايتا ورالعان جەڭىس - ءبارى وسى كىتاپتىڭ وزەگىندە.
اۆتور سپورتشىنىڭ جان دۇنيەسىنە تەرەڭ ۇڭىلەدى. بۇل تەك جەتىستىكتەر شەجىرەسى عانا ەمەس، سونىمەن بىرگە ءوزىن-ءوزى جەڭۋ، مىنەزدى شىڭداۋ، وتباسىنىڭ قولداۋى مەن جانكۇيەر سەنىمىنىڭ ماڭىزى تۋرالى ماعىنالى بايانداۋ. ءاربىر بيىك جەتىستىكتىڭ ارتىندا جىلدار بويعى تاباندى ەڭبەك، تەمىردەي ءتارتىپ پەن ارمانعا ادالدىق جاتىر.
كىتاپتىڭ نەگىزگى ويى ايقىن: ناعىز جەڭىس تاتاميگە شىعاردان الدەقايدا بۇرىن باستالادى. بۇل - قانداي قيىندىق بولسا دا مويىمايتىن، ءاردايىم العا ۇمتىلاتىن قاجىرلى، قايسار جاننىڭ جولى.
بۇل كىتاپتا تابيعي دارىن مەن ءوزىن ۇزدىكسىز جەتىلدىرۋدىڭ سيرەك كەزدەسەتىن ۇيلەسىمى باياندالادى. ەلدوس سمەتوۆتىڭ جولى - جاي عانا سپورتتىق جەتىستىكتەر شەجىرەسى ەمەس، كەز كەلگەن سالادا قولدانۋعا بولاتىن جەڭىمپازعا ءتان ويلاۋ ۇلگىسى، - دەگەن پىكىرىن ءبىلدىردى قازاقستان رەسپۋبليكاسىنىڭ تۋريزم جانە سپورت ءمينيسترى ەربول مىرزابوسىنوۆ.
مەن كوپتەگەن سپورتشىنى جاتتىقتىردىم، ءبىراق ەلدوس ءاردايىم ءبىر قاسيەتىمەن ەرەكشەلەنەتىن - ول ەشقاشان مويىمايتىن. ءتىپتى ەڭ اۋىر ساتتەردە دە. وليمپيادا چەمپيونى ءدال وسىلاي قالىپتاسادى، - دەيدى سپورتشىنىڭ جەكە جاتتىقتىرۋشىسى عالىمجان جىلگەلديەۆ.
ەلدوس سمەتوۆتىڭ تاريحى - تاباندىلىق، ءتارتىپ جانە وتانعا دەگەن سۇيىسپەنشىلىك ناعىز چەمپيوندى قالاي شىڭدايتىنىنىڭ جارقىن مىسالى. بۇگىندە مۇنداي كىتاپتار جاستارعا اسا قاجەت. ولار ءار جەڭىستىڭ ارتىندا جىلدار بويعى ەڭبەك پەن سىناقتان وتكەن مىنەز تۇرعانىن ءتۇسىنۋى ءتيىس، - دەپ اتاپ ءوتتى قازاقستان دزيۋدو فەدەراتسياسىنىڭ پرەزيدەنتى قۋانىشبەك ەسەكەيەۆ.
بۇل كىتاپتىڭ ەرەكشەلىگى - وقىرماندار QR- كودتار ارقىلى سپورتشىنىڭ شەشۋشى بەلدەسۋلەرىنىڭ بەينەجازباسىن تاماشالاي الادى.
«ەلدوس سمەتوۆ. ءتوزىم. سەنىم. جەڭىس» كىتابى كوپشىلىك وقىرمانعا ارنالعان. ول تەك سپورت جانكۇيەرلەرى عانا ەمەس، ءوز ماقساتىنا جەتۋ جولىندا جىگەر مەن شابىت ىزدەگەن ءاربىر وقىرمان ءۇشىن دە پايدالى بولماق.
