جاقىندا قايىق الامىز: شىمكەنت كوشەلەرىن سۋ باستى
تۇركىستان. KAZINFORM - تولاسسىز جاۋعان جاڭبىر سالدارىنان شىمكەنت كوشەلەرىن سۋ باستى.
الەۋمەتتىك جەلىدە تاراپ جاتقان ۆيدەودان كولىكتەردىڭ جولدا سۋ كەشىپ ءوتىپ جاتقانىن كورۋگە بولادى. ياعني، قالا جولدارى جاڭبىر سۋىنا تولىپ قالعان. قازىر توتەنشە جاعدايلار دەپارتامەنتىنەن 17 موتوپومپا، 66 ادام، 14 تەحنيكا سۋ تارتۋ جانە ايداۋ جۇمىستارىنا جۇمىلدىرىلدى. ولار قالا كوشەلەرىمەن قاتار جەكە ۇيلەردىڭ اۋلاسىنا كىرىپ كەتكەن سۋدى ايداۋ جۇمىستارىن دا جۇرگىزىپ جاتىر.
جەلىدەگى جازباعا پىكىر بىلدىرۋشىلەر جول جيەگىندەگى سۋ ارنالارىنىڭ دۇرىس جۇمىس ىستەمەيتىنىن ايتىپ جاتىر.
ولاردىڭ ىشىندە «جاقىندا قايىق الامىز»، «جاياۋ جۇرگىنشىلەرگە قيىن»، «كارىز جۇيەسىن دۇرىس جۇرگىزبەگەندىكتەن»، «سۋ اعاتىن ارىق نە ءۇشىن جاسالماعان»، «تەگىن اۆتومويكا» دەگەن جازبالار بار.
اۆتور
قايرات زاينيشەۆ
