جانىبەك ءالىمحان ۇلىنىڭ بوكس كەشىندە تاعى كىمدەر جۇدىرىقتاسادى
استانا. KAZINFORM - قازاقستاندىق بوكسشى، ورتا سالماقتاعى WBO جانە IBF چەمپيونى جانىبەك ءالىمحان ۇلىنىڭ 5-ساۋىردەگى بوكس كەشىندە تاعى كىمدەردىڭ جۇدىرىقتاساتىنى بەلگىلى بولدى.
اتالعان بوكس كەشىندە بۇگىندە ۇلتتىق قۇراما ساپىندا ەل نامىسىن قورعاپ جۇرگەن اعايىندى سابىرحاندار شارشى الاڭدا كاسىپقوي بوكستا باقتارىن سىناپ كورمەك. اعايىندى بوكسشىلاردىڭ قارسىلاسى ازىرگە انىقتالماعان.
سونداي-اق، وسى كۇنى سۇلتان زاۋىربەك پەن باتىر جۇكەمبايەۆ تا بوكس كەشىنىڭ كورىگىن قىزدىرادى دەپ جوسپارلانىپ وتىرعانى بەلگىلى بولدى.
سونىمەن قاتار 5-ءساۋىر كۇنى وزبەكستاننىڭ ەكى دۇركىن وليمپيادا چەمپيونى اتانعان باحودير جالولوۆ تا وسى كەشتە كاسىپقوي بوكستاعى شەبەرلىگىن كورسەتپەك.
5-ءساۋىر كۇنگى ەلوردامىزدا وتەتىن ءىرى كاسىپقوي بوكس كەشىنىڭ باستى جەكپە-جەگى قازاقستاندىق جانىبەك ءالىمحان ۇلى مەن فرانسۋزدىق اناۋەل نگاميسسەنگە اراسىندا وتەدى.
اۆتور كۇنسۇلتان وتارباي
