جانىبەك ءالىمحان ۇلىنىڭ استاناداعى بوكس كەشىنە بيلەتتەر ساتىلىمعا شىقتى

استانا. KAZINFORM - ورتا سالماقتا WBO جانە IBF نۇسقاسى بويىنشا الەم چەمپيونى، قازاقستاندىق كاسىپقوي بوكسشى جانىبەك ءالىمحان ۇلىنىڭ (16-0، 11 ك و) 5-ءساۋىر كۇنى استانا قالاسىندا وتەتىن بوكس كەشىنە بيلەتتەر ساتىلىمعا شىقتى.

ياندەكس افيشا سايتىنداعى بيلەتتەردىڭ قۇنى 20 مىڭ تەڭگەدەن باستالىپ، ەڭ قىمباتى 255 مىڭ تەڭگەگە باعالانىپ وتىر.

ايتا كەتەرلىگى، بوكس كەشىن قازاقستاندىق Nomad Promotions كومپانياسى ۇيىمداستىرىپ، ESPN تەلەارناسى تىكەلەي ەفيردەن كورسەتەدى.

ەسكە سالا كەتسەك، جانىبەك ءالىمحان ۇلى كەزەكتى جەكپە-جەگىندە اناۋەل نگاميسسەنگۋگە (14-0، 9 ك و) قارسى چەمپيوندىق بەلدىكتەرىن قورعايدى.

اتالعان بوكس كەشىندە بۇگىندە ۇلتتىق قۇراما ساپىندا ەل نامىسىن قورعاپ جۇرگەن اعايىندى سابىرحاندار شارشى الاڭدا كاسىپقوي بوكستا باقتارىن سىناپ كورمەك.

اعايىندى بوكسشىلاردىڭ قارسىلاسى ازىرگە انىقتالماعان.

سونداي-اق، وسى كۇنى سۇلتان زاۋىربەك پەن باتىر جۇكەمبايەۆ تا بوكس كەشىنىڭ كورىگىن قىزدىرادى دەپ جوسپارلانىپ وتىرعانى بەلگىلى بولدى.

كاسىپقوي بوكسشى وسىعان دەيىن وتكەن باسپا ءسوز ماسليحاتىندا Kazinform تىلشىسىنە الداعى جوسپارى تۋرالى ايتىپ بەرگەن بولاتىن.

اۆتور مۇحتار قاليموللا ۇلى