جانىبەك ءالىمحان ۇلى ساۋل الۆارەسكە تاعى دا ۇندەۋ جاسادى
استانا. قازاقپارات – WBO جانە IBF نۇسقالارى بويىنشا الەم چەمپيونى، قازاقستاندىق بوكسشى جانىبەك ءالىمحان ۇلى ايگىلى مەكسيكالىق بوكسشى ساۋل الۆارەسكە سەستى سالەمدەمە جولدادى.
الەم چەمپيونى جانىبەك ءالىمحان ۇلى مەكسيكالىق بوكستىڭ اڭىزى - ساۋل الۆارەسكە تاعى دا ۇندەۋ جاسادى. Kazakh Style لاقاپ اتىمەن تانىمال بوكسشى الەۋمەتتىك جەلىدەگى X پاراقشاسىندا كانەلوعا ەسكەرتۋ جاساپ، ونى جەڭەتىنىنە سەنىمدى ەكەنىن ءبىلدىردى.
«ەگەر ول دايىن بولسا، مەنىڭ دە دايىن ەكەنىمدى بىلەسىزدەر! ال سىزدەر نە بولاتىنىن جاقسى بىلەسىزدەر! بۇل جاي عانا «اقشا تولەنەتىن كۇن» ەمەس. بۇل كانەلو ءۇشىن ىستىق، جۇيكەگە تيەتىن، كۇيزەلىستى كۇن بولادى!» - دەپ مالىمدەدى جانىبەك ءالىمحان ۇلى.
قازاقستاندىق بوكسشى بىرنەشە جىلدان بەرى مەكسيكالىق چەمپيوننان جاۋاپ الۋعا تىرىسىپ كەلەدى، الايدا ساۋل الۆارەس ونىڭ شاقىرۋلارىنا كۇنى بۇگىنگە دەيىن رەاكسيا بىلدىرمەدى.
جانىبەكتىڭ كانەلومەن جەكپە-جەك وتكىزۋىنە كەدەرگى كەلتىرەتىن باستى فاكتورلاردىڭ ءبىرى - ولاردىڭ سالماق دارەجەسى مەن گونورار ايىرماشىلىعى.
ايتا كەتەيىك، جانىبەك ءالىمحان ۇلىنىڭ كەلەسى جەكپە-جەگى 5-ساۋىردە استاناداعى «بارىس ارەنادا» وتەدى. ونىڭ قارسىلاسى - فرانسۋز بوكسشىسى اناۋەل نگاميسەنگە. جەكپە-جەكتە قازاقستاندىق بوكسشىنىڭ WBO جانە IBF چەمپيوندىق بەلبەۋلەرى باسكە تىگىلەدى. سونداي-اق، بۇل تۋرنيردە قازاقستاندىق تانىمال بوكسشىلار دا ونەر كورسەتەدى. ولاردىڭ قاتارىندا جەڭىلىپ كورمەگەن نوكاۋت شەبەرى سۇلتان زاۋربەك، WBC ،WBA ،IBO جانە IBF بەلبەۋلەرىنىڭ بۇرىنعى يەگەرى باتىر جۇكەمبايەۆ جانە قازاقستاندىق قىز بوكسشى بالاۋسا ءمۇزدىمان بار.
بۇعان دەيىن جانىبەك ءالىمحان ۇلى دومينيكاندىق چەمپيون كارلوس ادامەستىڭ مالىمدەمەسىنە قاتاڭ جاۋاپ قايتارعان ەدى. سونىمەن قاتار، WBO جانە IBF تۇجىرىمى بويىنشا ورتا سالماقتاعى الەم چەمپيونى جانىبەك ءالىمحان ۇلى قارسىلاستارمەن جەكپە-جەك وتكىزۋ ماسەلەلەرى تۋرالى ايتىپ، سالماق دارەجەسىن وزگەرتۋ جوسپارى بار ەكەنىن ءبولىستى. ول ورتا سالماقتاعى الەم چەمپيونى كارلوس ادامەس وزىنمەن رينگكە شىعۋدان قورقاتىنىن دا مالىمدەگەن بولاتىن.
