جانىبەك ءالىمحان ۇلى قازاقستاندا چەمپيوندىق اتاعىن قورعايدى

استانا. KAZINFORM - ورتا سالماقتا WBO جانە IBF نۇسقاسى بويىنشا الەم چەمپيونى، قازاقستاندىق كاسىپقوي بوكسشى جانىبەك ءالىمحان ۇلىنىڭ (16-0، 11 ك و) كەزەكتى قارسىلاسى بەلگىلى بولدى.

Top Rank پروموۋتەرلىك كومپانياسىنىڭ حابارلاۋىنشا، جانىبەك ءالىمحان ۇلى كەزەكتى ايقاسىن قازاقستاندا وتكىپ، فرانسيالىق اناۋەل نگاميسسەنگۋگە (14-0، 9 ك و) قارسى چەمپيوندىق بەلدىكتەرىن قورعايدى.

ايتا كەتەرلىگى، جەكپە- جەك 5-ءساۋىر كۇنى استانا قالاسىندا وتەدى دەپ جوسپارلانىپ وتىر.

- قۇرمەتتى جانكۇيەرلەر، بۇيىرتسا 5 - ءساۋىر استانا قالاسىندا جۇدىرىقتاسامىز! وز ەلىمدە، سىزدەردىڭ الدارىڭىزدا ونەر كورسەتۋدى ماقسات ەتىپ ءجۇر ەدىم، وعان دا جەتتىك! بۇيىرتسا 2 الەم چەمپيونى تيتۋلىن قورعايمىز! Qazaq Style دى رينگ قاسىندا، ارەنادا وتىرىپ تاماشالايسىزدار! جەڭىستى كۇندە جۇزدەسەيىك، - دەپ جازدى جانىبەك الەۋمەتتىك جەلىدەگى پاراقشاسىندا.

ەسكە سالساق، جانىبەك ءالىمحان ۇلى سوڭعى جەكپە-جەگىن بىلتىر 4 - قازان كۇنى اۋستراليادا وتكىزىپ، جاڭا زەلانديالىق اندرەي ميحايلوۆيچتى توعىزىنشى راۋندتا تەحنيكالىق نوكاۋتپەن تىزە بۇكتىردى.

وسىعان دەيىن ق ر تۋريزم جانە سپورت ءمينيسترى ەربول مىرزابوسىنوۆ جانىبەكتىڭ جەكپە-جەگىن قازاقستاندا وتكىزۋ تۋرالى ايتقان بولاتىن.

 

مۇحتار قاليموللا ۇلى