جانىبەك ءالىمحان ۇلى مەن حامزا شيراز اراسىنداعى جەكپە-جەك قاشان وتەتىنى انىقتالدى
استانا. قازاقپارات – Top Rank باسشىسى بوب ارۋم جەڭىلمەگەن قازاقستاندىق بوكسشى جانىبەك ءالىمحان ۇلىنىڭ كەلەسى جەكپە-جەگىنە قاتىستى اقپاراتتى ءبولىستى.
ورتا سالماق وكىلىنىڭ بۇعان دەيىنگى ايقاسى قازان ايىنىڭ باسىندا وتكەن. سيدنەيدەگى كەشتە جانىبەك ءالىمحان ۇلى جاڭازەلانديالىق اندرەي ميحايلوۆيچتى توعىزىنشى راۋندتا نوكاۋتقا ءتۇسىردى. ارتىنشا WBO جەرلەسىمىزگە جاڭا قارسىلاس تاۋىپ بەردى.
قازىر جانىبەكتىڭ كومانداسى بريتانيالىق حامزا شيرازبەن كەلىسسوز جۇرگىزىپ جاتىر. پروموۋتەر بوب ارۋم دەن رافاەلگە بەرگەن سۇحباتىندا بوكسشىلار قاي ۋاقىتتا شارشى الاڭعا شىعاتىنىن ايتتى.
مامان شيرازبەن كەلىسسوزدەردىڭ ءساتتى ءوتىپ جاتقانىنا سەنىمدى. ارۋمنىڭ ءوزى بريتانيالىقتىڭ پروموۋتەرى فرەنك ۋوررەنمەن جاقسى تانىس. Top Rank باسشىسىنىڭ سوزىنە قاراعاندا، ءالىمحان ۇلىنىڭ اتاعىن قورعايتىن كۇن اقپان ايىندا وتەدى. بوب ارۋم بۇل جەكپە-جەك دجوشۋا مەن ديۋبۋا اراسىنداعى ريەۆانش اياسىندا ءوتۋى مۇمكىندىگىن جوققا شىعارمايدى. وسىلايشا، جانىبەك ءالىمحان ۇلى مەن حامزا شيراز 22-اقپان كۇنى ەر-ريادتا جۇدىرىقتاسۋى مۇمكىن.
