جانىبەك ءالىمحان ۇلى جەڭىلىپ كورمەگەن بريتاندىق بوكسشىمەن جۇدىرىقتاسادى
استانا. KAZINFORM - قازاقستاندىق كاسىپقوي بوكسشى جانىبەك ءالىمحان ۇلى (16-0، 11 ك و) جەڭىلىپ كورمەگەن بريتاندىق بوكسشىمەن جۇدىرىقتاسۋى مۇمكىن.

جۋرناليست ءارى ينسايدەر دەن رافاەل حابارلاعانداي، Top Rank پروموۋتەرلىك كومپانياسى بريتاندىق شاكيل تومپسونمەن (13-0، 9 ك و) كەلىسسوز جۇرگىزىپ جاتىر ەكەن.
بۇعان دەيىن حابارلاعانىمىزداي، جەكپە-جەك 5-ءساۋىر كۇنى استانادا ءوتۋى مۇمكىن.
ال وعان دەيىن تومپسون ءبىر جەكپە-جەك وتكىزىپ الماق. 7-اقپان شەففيلدتە 10 راۋندتىق كەزدەسۋ وتكىزەدى. ال قارسىلاسى ءالى انىقتالماعان. جانىبەكپەن جەكپە-جەگى جايلى رەسمي اقپارات، وسى كەزدەسۋىنەن كەيىن جاريالانۋى مۇمكىن.
27 جاستاعى شاكيل تومپسون WBO رەيتينگىندە 10-ورىندا تۇرعان بوكسشى. وزگە ۇيىمداردىڭ رەيتينگىنە ەنبەگەن. WBO Global جانە IBF European ايماقتىق بەلبەۋلەرىنىڭ يەگەرى. BoxRec بويىنشا ورتا سالماقتاعى بوكسشىلار رەيتينگىندە 35-ورىندا تۇر.