جانىبەك ءالىمحان ۇلى: باستى ماقسات ءتورت بەلدىكتى بىرىكتىرۋ

استانا. KAZINFORM - ورتا سالماقتاعى WBO جانە IBF تۇجىرىمى بويىنشا چەمپيونى، قازاقستاندىق كاسىپقوي بوكسشى جانىبەك ءالىمحان ۇلى Kazinform تىلشىسىنە الداعى جوسپارى تۋرالى ايتىپ بەردى.

بوكسشى الداعى جەكپە-جەكگىندە ەكى بىردەي چەمپيوندىق بەلدىگىن قورعايتىنىن ايتتى.

- ءيا، بارلىق جاعىن قاراستىرىپ، ويلاستىرىپ جاتىرمىز. بۇيىرتسا، ءبىز الداعى ايقاسىمىزدا WBO جانە IBF بەلدىكتەرىن قورعايمىز. وسىعان دەيىن، WBO تۇجىرىمى بويىنشا مىندەتتى قارسىلاس رەتىندە حامزا شيراز بەلگىلەنگەن بولاتىن. شاتاسپاسام، ودان كەيىن 4 قارسىلاسپەن كەلىسسوز ءجۇرىپ، بارلىعى شارشى الاڭعا شىعۋدان باس تارتتى. قورتىندىسىندا، وسى قارسىلاسىم جۇدىرىقتاسۋعا كەلىسىم بەردى، - دەدى جانىبەك.

سونىمەن قاتار، قازاقستاندىق بوكسشى الداعى ۋاقىتتا ورتا سالماقتاعى بارلىق چەمپيوندىق تيتۋلدى بىرىكتىرۋ باستى ماقسات ەكەنىن ايتتى.

- قازىرگى ۋاقىتتا قولىمىزدا ەكى چەمپيوندىق تيتۋل بار. پروموۋتەرلىك كومپانيا (TopRank) WBC جانە WBA بەلدىكتەرىن بىرىكتىرۋ ماقساتىندا جۇمىستار اتقارىپ جاتىر، - دەيدى الەم چەمپيونى.

بۇگىن استاناداعى «بارىس ارەنادا» جانىبەك ءالىمحان ۇلىنىڭ 5-ساۋىرگە جوسپارلانعان كەزەكتى جەكپە-جەگىنە ارنالعان باسپا ءسوز ءماسليحاتى ءوتتى.

بۇعان دەيىن حابارلانعانداي، ق ر تۋريزم جانە سپورت ءمينيسترى ەربول مىرزابوسىنوۆ جانىبەك ءالىمحان ۇلىنىڭ كەزەكتى جەكپە-جەگى قازاقستاندا ۇيىمداستىرىلاتىنىن ايتقان بولاتىن.

ايتا كەتەيىك، جانىبەك ءالىمحان ۇلىنىڭ 5-ءساۋىر استانا قالاسىندا جۇدىرىقتاساتىن قارسىلاسى فرانسيالىق بوكسشى - اناۋەل نگاميسسەنگۋ. ول وسىعان دەيىن 14 كەزدەسۋ وتكىزىپ، بارلىعىندا جەڭىسكە جەتكەن. ونىڭ 9 ىن مەرزىمىنەن بۇرىن جەڭگەن.

اۆتور مۇحتار قاليموللا ۇلى