جانىبەك ءالىمحان ۇلى الەمنىڭ ۇزدىك 20 بوكسشىسىنىڭ قاتارىنا كىردى

استانا. قازاقپارات - Boxingscene.com ءتىلشىسى ستيۆەن ەدۆاردس سالماق دارەجەسىنە قاراماستان الەمنىڭ ەڭ مىقتى بوكسشىلارىنىڭ ءتىزىمىن جاسادى، دەپ حابارلايدى Sports.kz.

بۇل تىزىمگە WBO جانە IBF نۇسقالارى بويىنشا الەم چەمپيونى قازاقستاندىق جانىبەك ءالىمحان ۇلى (17-0, 12 ك و) دا كىردى. ول 20- ورىندا تۇر.

P4P- رەيتينگىنىڭ كوشباسشىسى رەتىندە ەدۆاردس امەريكالىق بىلعارى قولعاپ شەبەرى تەرەنس كروۋفوردتى (41-0, 31 ك و) تاڭداعان.

سونىمەن قاتار، ۇزدىك بەستىككە ۋكراينالىق الەكساندر ۋسيك (23-0, 14 ك و)، جاپونيالىق ناويا ينوۋە (29-0، 26 ك و) مەن رەسەيلىك بوكسشىلار دميتريي بيۆول (24-1، 12 ك و) جانە ارتۋر بەتەربيەۆ (21-1، 20 ك و) كىردى.

ال الەمدىك بوكستىڭ بەت-بەينەسى سانالاتىن مەكسيكالىق ساۋل الۆارەستىڭ (62-2-2، 39 ك و) رەيتينگىدە 8- ورىندا تۇرعانى ايتىلعان.

وسىعان دەيىن جانىبەك ءالىمحان ۇلىنىڭ الەمدىك رەيتينگىدە ءبىر ساتى جوعارىلاعانى تۋرالى جازدىق.