جانداربەك بۇلعاقوۆ پەن ۇلان رىسقۇل «تازا قالا» جوباسىنا قاتىستى
استانا. KAZINFORM - تۇڭعىش قازاقستان بارىسى ۇلان رىسقۇل جانە ايتىسكەر اقىن جانداربەك بۇلعاقوۆ پرەزيدەنت تەلەراديوكەشەنىنىڭ «تازا قالا» جوباسىنىڭ تۇسىرىلىمىنە قاتىستى. بۇل اپتادا «تازا قالا» جوباسى تالدىقورعان قالاسىنان كەزەكتى شىعارىلىم ۇسىنادى.
وڭىردەگى دەنە شىنىقتىرۋ جانە سپورت باسقارماسىنىڭ باسشىسى، تۇڭعىش قازاقستان بارىسى ۇلان رىسقۇل وڭىردەگى جۇرتشىلىقتىڭ تازالىق مادەنيەتىنە باعاسىن بەردى. بولاشاق چەمپيونداردى دايىنداپ جۇرگەن سپورتشى تاربيە تازالىقتان باستالاتىنىن قاپەردەن شىعارمايدى. جەڭىمپاز اتانۋ ءۇشىن وزىڭە دە، وزگەنىڭ ەڭبەگىنە دە قۇرمەتپەن قاراۋ كەرەك.
«تالدىقورعاننىڭ تازالىعىن 10/10 ۇپايمەن باعالار ەدىم. بالالارىممەن كەشكى سەرۋەنگە ساياباقتارعا ءجيى شىعامىز، اينالا جاپ-جاسىل بوپ جاتىر. سپورت كەشەندەرىنىڭ كوپشىلىگى تالدىقورعان قالاسىندا ورنالاسقان. ولاردىڭ اينالاسىندا ەكى اپتا سايىن سەنبىلىك جاسايمىز، اعاشتاردى اكتەپ، ارىقتاردى تازالايمىز. كوكتەم باستالعالى كوپتەگەن ءىس- شارا وتكىزدىك»، - دەدى ۇلان رىسقۇل.
ايتىسكەر اقىن جانداربەك بۇلعاقوۆ تا - جەتىسۋدىڭ تۋماسى. باعدارلاماعا ارنايى سۇحبات بەرگەن اقىن جۇرگىزۋشىمەن كىشىگىرىم ايتىس وتكىزىپ تە ۇلگەردى.
«ارىق ماسەلەسى، جول ماسەلەسى بىزدە عانا ەمەس، بارلىق وبلىستا كەزدەسەدى. ونىڭ شەشىلۋىنە بيلىك وكىلدەرىن نەمەسە باسشىلاردى عانا جۇمىلدىرىپ قويماي، تۇتاس ەل بولىپ اتسالىسۋىمىز كەرەك» ، - دەيدى اقىن.
باعدارلاما سوڭىندا جانداربەك بۇلعاقوۆ «تازا قالا» باعدارلاماسى ارقىلى قونايەۆتاعى ارىپتەسى سىرىم اۋەزحانعا ەستافەتا جولدادى.
ايتا كەتەيىك، ءتۇسىرىلىم توبى قازاقستاننىڭ ءىرى جانە شاعىن قالالارىنا بارادى جانە ءارقايسىسىنىڭ تازالىعى مەن كوركى تۋرالى اڭگىمەلەيدى. جۋرناليستەر جەرگىلىكتى تۇرعىندارمەن كەزدەسەدى، كوممۋنالدىق قىزمەتتەردىڭ جۇمىسىن كورەدى. قوعامدىق بىرلەستىك وكىلدەرىمەن، ايماقتىڭ ەكولوگيالىق ومىرىنە بەلسەندى قاتىساتىن بارلىق ەرىكتىمەن تانىسادى.
قالالار رەيتينگىندە تالدىقورعان 19 ۇپاي الدى جانە الماتى مەن قىزىلوردادان كەيىن ءۇشىنشى ورىنعا تۇراقتادى. بۇعان دەيىن Kazinform سايتىندا شىمكەنت (18 ۇپاي)، تۇركىستان (18)، تاراز (15)، قىزىلوردا (20)، وسكەمەن (11)، سەمەي (14)، پاۆلودار (17) جانە الماتى (25) قالالارىنىڭ تازالىعى جونىندە رەپورتاجدار سەرياسى جاريالانعان ەدى.
ايتا كەتەيىك، «تازا قازاقستان» ەكولوگيالىق باعدارلاماسى اياسىندا تەلەگرام-بوت ىسكە قوسىلدى. ەندى كەز كەلگەن ادام سيفرلىق جۇيە ارقىلى قۇزىرلى ورگانعا ەكولوگيالىق ارىز-شاعىمىن جەتكىزە الادى. ول ءۇشىن بوتتىڭ باستى مازىرىنەن «ءوتىنىش جولداۋ» وپتسياسىن تاڭداپ، ماسەلەنىڭ ءمان-جايىن تولىق سيپاتتاپ جازىپ، قوسىمشا فوتو نەمەسە ۆيدەو جۇكتەۋ كەرەك. حابارلاماڭىز جەرگىلىكتى اكىمشىلىككە جولدانادى. ارتىنشا ءوتىنىش تىركەلگەنى، قارالىپ جاتقانى نەمەسە ورىندالعانى تۋرالى جاۋاپ كەلەدى. ناتيجەسىندە شاعىمدانۋشى ورىندالعان جۇمىستى 5 بالدىق جۇيەمەن جانە كوممەنتاري جازۋ ارقىلى باعالايدى. ەگەر 3-تەن تومەن باعا قويىلسا، ماسەلە تىڭعىلىقتى اتقارىلۋى ءۇشىن اكىمدىككە قايتا جولدانادى.
اۆتور
ايجان سەرىكجان قىزى
