جانارماي باعاسى مەن ق ق س-نىڭ ءوسۋى تاكسي باعاسىنا قالاي اسەر ەتەدى - مينيستر جاۋابى

استانا. KAZINFORM - كولىك ءمينيسترى مارات قارابايەۆ ۇكىمەت وتىرىسىنان كەيىن وتكەن باسپا ءسوز ءماسليحاتىندا قوسىلعان قۇن سالىعىن كوتەرۋ باستاماسى مەن جانارماي باعاسىنىڭ نارىققا بەرىلۋى تاكسي باعاسىنا قالاي اسەر ەتەتىنى تۋرالى پىكىر ءبىلدىردى.

Жанармай бағасы мен ҚҚС-ның өсуі такси бағасына қалай әсер етеді – министр жауабы
فوتو: اعىباي اياپبەرگەنوۆ/kazinform

- اۋە قىزمەتى بويىنشا، اۆياوتىن اۋەلدەن نارىقتىق باعامەن رەتتەلەدى. سوندىقتان ءسىز ايتىپ وتىرعان وزگەرىستەر ول جاققا ەشقانداي اسەر ەتپەيدى. تەمىرجول باعاسىن مەملەكەت رەتتەيتىنىن جاقسى بىلەسىزدەر. بۇل جاقتا دا پويىز بيلەتىنىڭ قىمباتتاۋىن جوسپارلاپ وتىرعان جوقپىز. تاكسيگە كەلسەك، ول جاقتا جانارماي نارىققا بەرىلىپ جاتىر. ياعني، بۇل جاقتا باعانى نارىق ايقىندايدى، - دەدى ول.

مينيستر كەلەشەكتە تاكسي باعاسى قاراپايىم جۇرگىزۋشىلەر مەن ينتەرنەت اگرەگاتورلار ءوزارا كەلىسىپ ايقىنداۋى مۇمكىن ەكەنىن اتاپ ءوتتى.

- جالپى تاكسي قىزمەتىنىڭ باعاسى نارىقتا. ياعني، ونسىز دا ونى مەملەكەت رەتتەپ وتىرعان جوق. ءبىراق ءبىز وسى سالاداعى ءوزىن-ءوزى رەتتەۋ تۋرالى زاڭ جوباسىن تالقىلاپ جاتىرمىز. سول زاڭ جوباسىنىڭ اياسىندا ءبىز نە بەرىپ وتىرمىز؟ الپاۋىت ينتەرنەت اگرەگاتى مەن تاكسي جۇرگىزۋشىلەرى ءوزارا كەلىسىپ، سونداي ءبىر كەلىسىمگە كەلۋگە بولادى. مىسالى، 1 شاقىرىمعا ادام تاسىمالداۋدىڭ قۇنى قانشا بولادى دەگەن سياقتى. ودان اگرەگاتتىڭ الاتىن پايىزى قانشا بولاتىنىن كەلىسۋگە بولادى. بۇعان مەملەكەت ارالاسپايدى كولىك يەلەرى مەن اگرەگات ءوزارا كەلىسىمگە كەلەدى دەگەن نورما ۇسىنىپ وتىرمىز. وسى زاڭ نورماسى بويىنشا پيلوتتىق تۇردە جۇمىس باستايمىز، دەپ جوسپارلاپ وتىرمىز، - دەدى مارات قارابايەۆ.

بۇعان دەيىن بيىل ەلدەگى اۆتوجولداردىڭ اقىلى ۋچاسكەلەرىندەگى تاريفتەر ورتا ەسەپپەن 30 پايىزعا ءوسۋى جوسپارلانعانى ءمالىم بولعان ەدى.

اۆتور

ەسىمجان ناقتىباي

سوڭعى جاڭالىقتار