جامبىلدا جەتىم بالالاردى باۋىرىنا باسقان ەكى پوليتسەي بار

تاراز. KAZINFORM - جامبىل وبلىسىنىڭ پوليتسەيلەرى بالالار ءۇيىنىڭ جەتكىنشەكتەرىنە جاڭا ءومىر سىيلادى. Polisia.kz ءوز قىزمەتىمەن قوسا اتا-انا مىندەتىن مۇلتىكسىز اتقارىپ جۇرگەن وفيتسەرلەردىڭ حيكاياسىن اڭگىمەلەيدى.

Фото: Polisia.kz
Фото: Polisia.kz

جامبىل وبلىسىنىڭ پوليتسيا دەپارتامەنتىندە قاۋىرت جۇمىسىمەن قاتار، قايىرىمدى ءىس جاساۋدى ءومىر سالتىنا اينالدىرعان قىزمەتكەرلەر جەتكىلىكتى.

پوليتسيا كاپيتانى عالىم ارىستانبايەۆ ءۇش تۋعان ۇلىمەن بىرگە سەگىز بالانى باۋىرىنا باسسا، پوليتسيا پودپولكوۆنيگى ديليافرۋز كەنجەحانوۆا - ءوزىنىڭ بەس بالاسىنا قوسا ءتورت ۇل-قىزدى تاربيەلەپ وتىرعان كوپبالالى انا.

ءۇش ۇلىنىڭ ارتىنان تۇلىمى جەلبىرەگەن قىز بالاسىن ارمانداعان جامبىل وبلىسى پوليتسيا دەپارتامەنتىنىڭ پاترۋلدىك پوليتسيا باتالونىنىڭ ينسپەكتورى عالىم ارىستانبايەۆ پەن جۇبايى ءاليا وزدەرى ءجيى بارىپ تۇراتىن بالالار ۇيىنە كەزەكتى رەت اتباسىن بۇرادى.

ءبىر ءۇيدىڭ ادامدارىنداي تاتۋ- ءتاتتى تۇراتىن بالالاردىڭ بىرەۋىن الىپ كەتەردە ءبىر-ءبىرىن قيماي، كوزدەرىنە جاس تولعانىن كورگەن پوليتسەي ولاردى ايىرمايىق دەگەن ويمەن سەگىز بىردەي بالانى اسىراپ العان.

العاشىندا تۋىستارى قاتتى تاڭعالىپ، كەيبىرى ءتىپتى قارسى بولىپتى، ءبىراق ءقازىر ولار ماتەريالدىق جاعىنان دا، رۋحاني تۇرعىدان دا كومەگىن ايامايدى.

بالالاردىڭ اراسىندا ءازىربايجان، وزبەك، ورىس، قىتاي ۇلتى بار بولعانىمەن، ولاردىڭ بارلىعى دا قازاق تىلىندە سويلەپ، قازاق مەكتەبىندە ءبىلىم الادى.

جارى ءاليا - پەداگوگ مامان، الايدا ۇيدە بالالاردىڭ تاربيەسىمەن اينالىسادى.

5 ۇل مەن 6 قىزدان قۇرالعان 11 بالالى ارىستانبايەۆتار وتباسى اۋىزبىرشىلىكتىڭ ارقاسىندا وبلىستىق «مەرەيلى وتباسى» كونكۋرسىنىڭ جەڭىمپازى اتانىپ، رەسپۋبليكالىق بايقاۋدىڭ فيناليسى بولعان.

سونىمەن قاتار پوليتسيا ينسپەكتورى «قازاقستاننىڭ 100 جاڭا ەسىمى» جوباسىنىڭ جەڭىمپازدارى قاتارىنا كىردى.

پوليتسيا دەپارتامەنتىنىڭ جەرگىلىكتى پوليتسيا قىزمەتى باسقارماسىندا كامەلەتكە تولماعاندار ءىسى قىزمەتىندە جۇرگەن ديليافرۋز كەنجەحانوۆا ادەتتەگىدەي جۇمىس بابىمەن شاراپوۆتار وتباسىمەن تانىسۋعا بارادى.

كامەلەتكە تولماعان 4 جاس ءوسپىرىمنىڭ قانداي جاعدايدا ءومىر ءسۇرىپ جاتقانىن كورگەن پوليتسيا قىزمەتكەرىنىڭ جۇرەگى قان جىلاعان.

ۇل بالالاردىڭ ءۇستى-باسى كىر، ال قارشاداي قىزدىڭ ىدىستى مۇزداي سۋمەن جۋعانىن كورىپ جانى اۋىرادى. ءوزى دە بەس بالانىڭ اناسى ديليافرۋز كوز جاسىن تيا الماي، جىلاپ جىبەرگەن.

ول سول ساتتە-اق بالالاردى قامقورلىعىنا الامىن دەپ شەشىم قابىلداعان. ونىڭ بالا اسىراپ الۋ تۋرالى قادامىن جولداسى مەن تۋعاندارى دا تۇسىنىستىكپەن قابىلداعان.

اكەسى جوق، اناسى قايتىس بولعان 4 بالانى سول كۇنگە دەيىن كۇنىن ارەڭ كورىپ جۇرگەن اتاسى اسىراپ كەلگەن.

پوليتسيا پودپولكوۆنيگى قاريانى دا 9 بالامەن بىرگە ۇيىنە پانالاتقان.

توعىز بالا تاربيەلەپ وتىرعان باتىر انانى ەل پرەزيدەنتى قاسىم-جومارت توقايەۆ «قۇرمەت» وردەنىمەن، ىشكى ىستەر ءمينيسترى «العىس» مۇسىنشەسىمەن ماراپاتتادى.

قازىرگى تاڭدا د. كەنجەحانوۆا ايەلدەردى زورلىق-زومبىلىقتان قورعاۋ بولىمىندە نازىك جانداردىڭ جوعىن جوقتاپ، قۇقىعىن قورعاپ ءجۇر.

قامقورلىققا ءزارۋ بۇلدىرشىندەردى ءتۇرى مەن تىلىنە قاراماي باۋىرىنا باسىپ، كوپكە ۇلگى بولعان بۇل وتباسىلار بۇگىندە بالالى ءۇي بازار بولىپ، تاتۋ-ءتاتتى كۇن كەشۋدە.

جۇرەگى مەيىرىمگە تولى ەكى پوليتسەي دە - وتباسىمەن قاتار ءوز قىزمەتتىك مىندەتتەرىن ءمىنسىز ورىنداپ جۇرگەن ۇلگىلى وفيتسەرلەر.

سوڭعى جاڭالىقتار