جامبىل وبلىسىندا جىل باسىنان بەرى 70 تەن استام جوعالعان جاس ءوسپىرىم تابىلعان
تاراز. KAZINFORM - جىل باسىنان بەرى جامبىل وبلىسىنىڭ پوليتسەيلەرى «ليدەر KZ» ەرىكتىلەرىمەن بىرلەسىپ، كامەلەتكە تولماعان 77 جاس ءوسپىرىمدى ىزدەستىرىپ، ولاردىڭ 68 ىن سول كۇنى تاپتى.
بالالار مەن جاس وسپىرىمدەردىڭ ءوز بەتىنشە ۇيلەرىنەن كەتۋىنىڭ نەگىزگى سەبەپتەرى - اتا-انالارىمەن جانجال جانە ولاردان قورقۋ، قاڭعىباستىق، بالالاردىڭ ەركەلىگى مەن جاۋاپسىزدىعى، كەزبەلىك. نەگىزىنەن مەكتەپتە وقيتىن بالالار ۇيدەن كەتىپ قالىپ جاتاتىن كورىنەدى. ۇيلەرىنەن قاشقانداردىڭ 55 پايىزى قىزدار.
بۇگىندە جامبىل وبلىسىنىڭ پوليتسەيلەرىمەن بىرگە 50 دەن استام ەرىكتى جوعالعان ادامداردى ىزدەستىرۋدە. ەرىكتىلەردىڭ ايتۋىنشا، جوعالعان ەرەسەك ادامعا قاراعاندا بالانى ىزدەپ تابۋ وڭايىراق. ول ءۇشىن پوليتسيا مەن ەرىكتىلەر جوعالعان ادامنىڭ تۋىستارىمەن سويلەسىپ، ونىڭ الەۋمەتتىك ورتاسىن، الەۋمەتتىك جەلىلەرىن زەرتتەپ، سول جەردەن العاشقى ىزدەۋ شارالارىنىڭ نەگىزگى ورىندارىن تاڭدايدى.
«مەنىڭ تاجىريبەمدە ايتارلىقتاي ورىن العان وقيعا، ول اتا-انالارىمەن ۇرىسىپ، ۇيدەن كەتىپ قالعان 3 قىزدى تاپقانىمىز. ولاردىڭ ءبارى ۇيدەن قاشىپ كەتكەن، سەبەبى اناسى ونى كەشكە وتىرىسقا جىبەرمەگەن. ال قىزدار توسەك جايماسىن پايدالانىپ، ءۇشىنشى قاباتتىڭ تەرەزەسىنەن شىعىپ كەتكەن. ءبىز پوليتسەيلەرمەن بىرگە قىزداردىڭ جالعا العان پاتەرىنە باردىق. ولاردى پاتەردەن سىرتقا شىعارۋ قيىن بولدى. اڭگىمەلەسۋدەن كەيىن بارلىعى ءساتتى اياقتالدى. ءتارتىپ ساقشىلارىنىڭ ءاردايىم جەدەل ءارى جوسپارلى تۇردە جۇمىس ىستەيتىنىن اتاپ وتكىم كەلەدى، بۇل بىرلەسكەن ىزدەۋ جۇمىستارىن ايتارلىقتاي جەڭىلدەتەدى»، - دەيدى «ليدەر KZ» ەرىكتىلەر قوزعالىسىنىڭ جەتەكشىسى ناتاليا افاناسيەۆا.
بۇعان دەيىن جامبىل وبلىسىندا دەمالىس باستالعالى 236 جاس ءوسپىرىم پوليتسيا بولىمدەرىنە جەتكىزىلگەنىن جازعان بولاتىنبىز.
اۆتور
ەلۆيرا جارىلقاسىنوۆا
