جامبىل وبلىسىندا اناباي كەن ورنىنان گازدىڭ جاڭا كوزى اشىلدى

استانا. KAZINFORM - جامبىل وبلىسىنداعى اناباي كەن ورنىندا گەولوگيالىق بارلاۋ جانە گازدىڭ رەسۋرستىق بازاسىن ۇلعايتۋ جۇمىستارى جالعاسۋدا. №17 ۇڭعىمادان گازدىڭ جاڭا كوزى اشىلدى.

QazaqGaz ۇ ك دەرەگىنشە، قاجەتتى جۇمىستار جۇرگىزىلگەننەن كەيىن ونەركاسىپتىك گاز اعىنى الىندى - بۇل ۇڭعىمانى ودان ءارى يگەرۋدىڭ ماڭىزدى كورسەتكىشى. بۇل - ۇڭعىمانىڭ جوعارى ونىمدىلىگىن جانە ونىڭ ستراتەگيالىق ماڭىزدىلىعىن راستايدى.

- يگەرۋ كەزىندە گاز الاۋى الىندى، بۇل جوسپاردىڭ دەبيتتىك كورسەتكىشتەرىنىڭ جوعارى ەكەندىگىن كورسەتەدى. الاۋ نەعۇرلىم قۋاتتى جانە جوعارى بولسا، ۇڭعىماداعى گازدىڭ شىعىمى سوعۇرلىم جوعارى بولادى.

بۇگىننەن باستاپ ۇڭعىما ىسكە قوسىلدى، گاز تۇراقتى الىنا باستادى. №17 ۇڭعىما انابايداعى گاز ءوندىرۋ كولەمىن ۇلعايتاتىن نەگىزگى وبەكتىلەردىڭ ءبىرى بولا الادى، بۇل ءوز كەزەگىندە گازدىڭ رەسۋرستىق بازاسىن ۇلعايتۋعا جانە ءوڭىردىڭ ەنەرگەتيكالىق قاۋىپسىزدىگىن نىعايتۋعا ىقپال ەتەدى، - دەلىنگەن اقپاراتتا.

اناباي كەن ورنىنداعى №17 ۇڭعىمانى بۇرعىلاۋ 2024 -جىلدىڭ 3 - قىركۇيەگىندە ءساتتى باستالدى. 25 - قاراشادا ماماندار 3690 مەتر تەرەڭدىكتەن گاز شىققانىن راستادى.

QazaqGaz بارلىق تەحنولوگيالىق پروتسەستەردى وڭتايلاندىرۋمەن جانە ەكولوگيالىق ستاندارتتاردى ەسكەرە وتىرىپ، اناباي كەن ورنىن ءتيىمدى يگەرۋ بويىنشا قويىلعان ماقساتتاردى ىسكە اسىرۋدى جالعاستىرۋدا. الىنعان ناتيجەلەر گەولوگيالىق بارلاۋعا ينۆەستيتسيا قۇيۋدىڭ بەكەر ەمەستىگىن راستايدى، بۇل گازدىڭ تۇراقتى جەتكىزىلۋى مەن گازدىڭ رەسۋرستىق بازاسىن كەڭەيتۋدى قامتاماسىز ەتەدى.

ال QazaqGaz-  24 جەلتوقساننان باستاپ №18 جاڭا ۇڭعىمانى بۇرعىلاۋدى باستادى.

بۇعان دەيىن «QazaqGaz» ۇ ك» ا ق باسقارما ءتوراعاسى پرەزيدەنتكە ەسەپ بەرگەن بولاتىن.