جامبى اتۋدا ەكى قازاقستاندىق مەرگەن فينالعا شىقتى

استانا. KAZINFORM - بۇگىن 5-دۇنيەجۇزىلىك كوشپەندىلەر ويىندارىندا ءداستۇرلى ساداق اتۋدىڭ جامبى نىساناسىن كوزدەۋدەن سايىس ءوتىپ جاتىر. ازىرگە 2 قازاقستاندىق مەرگەن فينالعا شىقتى.

جامبى نىساناسىندا ەرلەر دە، ايەلدەر دە 30 مەتر قاشىقتىقتا نىسانا كوزدەيدى. مۇندا ءار سپورتشىعا 5 مۇمكىندىكتەن بەرىلەدى، ءار مۇمكىندىكتە 2 مينۋت ۋاقىت بولادى جانە 5 جەبە اتىلادى.

ۇپاي سانى تەڭ تۇسكەن جاعدايدا 5 جەبەمەن تاعى ءبىر مۇمكىندىك بەرىلەدى. تاعى دا تەڭ تۇسسە - 1 جەبەدەن 1 مۇمكىندىك بەرىلەدى.

ەگەر وسى مۇمكىندىكتە دە تەڭ ۇپاي بولسا، سيفرلانعان نىسانعا 1 وقتان 1 مۇمكىندىك بەرىلەدى. بۇل ءتاسىل جەڭىمپاز انىقتالعانشا قايتالانادى.

سوڭىندا ەڭ جوعارى ۇپاي جيناعان سپورتشى جەڭىمپاز اتانادى.

جارىس قورىتىندىسى بويىنشا ەرلەر اراسىندا قازاقستاندىق جانىبەك قۇلمىرزايەۆ پەن باقبەرگەن ءسالىم، رۋمىنيالىق الين ميحاي تۋدوران جانە رەسەيلىك گافۋر راحمانگۋلوۆ اقتىق سايىسقا شىقتى.

ايەلدەر اراسىندا قازاقستاندىق سپورتشىلار فينالعا شىعا المادى، جۇلدەلى ورىندارعا رەسەيلىك اننا الەكسەيەۆا، ماجارستاندىق حۋنينە دوموكوس، يندونەزيالىق سۋري رەنو جانە تۇركيالىق ايشەگۇل دەميرباگ تالاسادى.

فينال ويىندارى بۇگىن استاناداعى «ارعىماق» ات-سپورت كەشەنىندە ساعات 16:00 دە باستالادى.

ايتا كەتەيىك، سايىستىڭ العاشقى كۇنى جانىبەك قۇلمىرزايەۆ پۋتا نىساناسىن كوزدەۋدە التىن جۇلدە جەڭىپ العان ەدى.

سونىمەن بىرگە، مەرگەندەر ەربول تاپەنوۆ - كۇمىس، قانات قاسىمحان - ەكى قولا جانە ايكوركەم باتيحان - تاعى ءبىر قولا جۇلدەنى ەل قانجىعاسىنا سالدى.

اۆتورايجان سەرىكجان قىزى