جالپىعا بىردەي مۇمكىندىك بەرەتىن ادىلەتتى قازاقستاندى قۇرۋعا كىرىستىك - پرەزيدەنت
قازاقستان ۇزاق مەرزىمگە ارنالعان ۇلتتىق مۇددەسىنە ساي كەلەتىن ساليقالى سىرتقى ساياسات جۇرگىزىپ، حالىقارالىق ارەناداعى بەدەلىن ارتتىرا ءتۇستى.
بۇل تۋرالى مەملەكەت باسشىسى قاسىم-جومارت توقايەۆ جاڭاجىلدىق بەينەقۇتتىقتاۋىندا ايتتى، دەپ حابارلايدى Kazinform.
«جۇمىسشىلاردىڭ، ينجەنەرلەردىڭ جانە شارۋالاردىڭ ەسەلى ەڭبەگى، اسكەريلەر مەن قۇقىق قورعاۋ ورگاندارى قىزمەتكەرلەرىنىڭ قاستەرلى وتانىمىزعا قالتقىسىز قىزمەتى، كاسىپكەرلەردىڭ تابىستى جوبالارى، مادەنيەت قايراتكەرلەرىنىڭ شىعارماشىلىعى جانە عالىمداردىڭ ەلگە پايدالى زەرتتەۋلەرى ارقىلى ۇلتىمىزدىڭ جاسامپازدىق الەۋەتى ارتا ءتۇستى. ءوز كاسىبىن ءمىنسىز اتقارىپ جۇرگەن مۇعالىمدەر، مەديتسينا قىزمەتكەرلەرى جانە باسقا دا ەڭبەك ادامدارى - بۇگىنگى كۇننىڭ ناعىز باتىرلارى»، - دەدى پرەزيدەنت ءوز قۇتتىقتاۋىندا.
پرەزيدەنت ايتقانداي، ۆولونتەرلەر، مەتسەناتتار، قۇتقارۋشىلار جانە وزگە دە جاناشىر ازاماتتار يگى ىستەر جاساپ، جانكەشتى ەرلىك كورسەتىپ، تىلەكتەستىك پەن قامقورلىقتىڭ وزىق ۇلگىسىن تانىتتى.
«ءبىز جاڭا قوعامدىق ەتيكانى قالىپتاستىرۋ، ەڭبەكقورلىق پەن ءبىلىمپازدىقتى دارىپتەۋ جانە كرەاتيۆتى ەكونوميكانى دامىتۋ ءۇشىن كوپتەگەن ماڭىزدى جۇمىستى قولعا الدىق. ەلىمىزدە كاسىبي سپورتپەن قاتار، بۇقارالىق سپورت قارقىندى دامۋدا. اسىرەسە، بالالار دەنە شىنىقتىرۋمەن بەلسەندى اينالىساتىن بولدى. سول سەبەپتى مەملەكەت اۋىلدىق جانە قالالىق جەرلەردە جاڭا سپورت نىساندارىن سالىپ جاتىر»، - دەدى ق. توقايەۆ.
سونداي-اق، قازاقستان ۇزاق مەرزىمگە ارنالعان ۇلتتىق مۇددەسىنە ساي كەلەتىن ساليقالى سىرتقى ساياسات جۇرگىزىپ، حالىقارالىق ارەناداعى بەدەلىن ارتتىرا ءتۇستى.
«ءبىر سوزبەن ايتقاندا، وسى جىل ءبىزدىڭ ەلىمىز ءۇشىن مول تابىسقا، جارقىن ساتتەرگە جانە ماڭىزدى وقيعالارعا تولى بولدى. جالپى، ەكونوميكامىز 4,9 پايىزعا ءوستى. تۇتاس جۇرت بولىپ كوپتەگەن وزەكتى ماسەلەنى شەشە باستادىق. وسىلايشا، ەلىمىزدىڭ دامۋىنا تىڭ سەرپىن بەردىك. ەڭ باستىسى، ءبىز جالپىعا بىردەي مۇمكىندىك بەرەتىن ادىلەتتى قازاقستاندى قۇرۋعا كىرىستىك. جۇرگىزىلگەن رەفورمالار ءوز جەمىسىن بەرە باستادى. بۇل - بارىمىزگە ورتاق ءىس. سوندىقتان مەن وسى ماڭىزدى جۇمىسقا اتسالىسقان بارشا ازاماتقا العىس ايتامىن»، - دەدى مەملەكەت باسشىسى.
