جالپىعا بىردەي دەكلاراتسيالاۋ: قولما-قول اقشاسىن كورسەتۋدى ۇمىتقان ادام نە ىستەۋى كەرەك

استانا. KAZINFORM - مەملەكەتتىك كىرىستەر كوميتەتى جەكە تۇلعالاردىڭ كىرىستەرىن اكىمشىلەندىرۋ باسقارماسىنىڭ باسشىسى دينا قۇسايىنوۆا دەكلاراتسيا تاپسىرۋ كەزىندە قولما-قول اقشاسىنىڭ ءبىر بولىگىن كورسەتۋدى ۇمىتىپ كەتكەن ادام نە ىستەۋى كەرەگىن ءتۇسىندىردى.

- ەگەر ءبىز قانداي دا ءبىر زاڭ بۇزۋشىلىقتى انىقتاساق، ول ادامعا حابارلاما جىبەرەمىز. مۇمكىن بىرەۋ قايبىر مۇلكىن كورسەتۋدى ۇمىتىپ كەتكەن شىعار؟ بىزدە اراسىندا ادامداردىڭ قولما-قول اقشاسىن كورسەتۋدى ۇمىتىپ كەتەتىن جاعداي كەزدەسىپ تۇرادى. سودان سوڭ قوسىمشا دەكلاراتسيا تاپسىرىپ، وندا ماتراسىنىڭ استىندا ميلليون تەڭگەسى قالىپ قويعانىن كورسەتەدى، - دەيدى ول.

باسقارما باسشىسىنىڭ ايتۋىنشا، بۇنداي جاعدايدا الاڭدايتىن دانەمە جوق. زاڭنامادا ءوتىنىمنىڭ ەسكىرۋ مەرزىمى دەگەن ۇعىم بار. جالپىعا بىردەي دەكلاراتسيادا بۇل 3 جىلدى قۇرايدى.

ياعني ازامات ءۇش جىلدىڭ ىشىندە قوسىمشا دەكلاراتسيا تاپسىرىپ، مالىمەتتى تولىقتىرا الادى.

ايتا كەتەيىك، ەندىگى جەردە ەل تۇرعىندارى دەكلاراتسيانى بەلگىلەنگەن مەرزىمدە تاپسىرماسا، وندا ول «نولدىك كورسەتكىشپەن ۇسىنىلدى» دەپ سانالماق. بۇنداي وزگەرىستى جاڭا سالىق كودەكسىنە ەنگىزۋ كوزدەلگەن.