جالعىز ءوزى ءتىرى قالعان - ۇشاق اپاتىنان امان قالعانداردىڭ شىنايى وقيعالارى
استانا. KAZINFORM — ۇشاق اپاتىنان امان قالۋ مۇمكىندىگى از، ءبىراق نولگە تەڭ ەمەس. Massaget.kz ءتىلشىسى اۋە اپاتتارى كەزىندە ءبىر ادام امان قالعان ەرەكشە وقيعالاردى ۇسىنادى.
ۆەسنا ۆۋلوۆيچ
1972-جىلى 26-قاڭتاردا چەحوسلوۆاكيا مەن شىعىس گەرمانيا شەكاراسىندا يۋگوسلاۆيالىق McDonnell Douglas DC-9-32 اۋە لاينەرى جارىلدى. ۇشاقتىڭ بورتىندا 28 ادام بولدى.
اپاتتان ءبىر عانا قىز - 22 جاستاعى سەربيالىق ستيۋاردەسسا ۆەسنا ۆۋلوۆيچ امان قالدى. قىز 10 كيلومەتردەن استام بيىكتىكتەن قۇلاعان. ول ءتىپتى پاراشيۋتسىز وسىنداي بيىكتىكتەن قۇلاپ، امان قالعان جالعىز ادام رەتىندە گيننەستىڭ رەكوردتار كىتابىنا كىردى.
ۆەسنا ۆۋلوۆيچتى ورمانشى تاۋىپ الدى. قىزدىڭ جولى بولدى، سەبەبى ورمانشى ەكىنشى دۇنيەجۇزىلىك سوعىس كەزىندە دارىگەر بولىپ جۇمىس ىستەگەن، سوندىقتان ول قىزعا العاشقى مەديتسينالىق كومەك كورسەتە الدى.
ۆەسنا قۇلاۋ كەزىندە اۋىر جاراقات الدى، سونىڭ ىشىندە باس سۇيەك ىشىندە قان كەتكەن، جامباسى مەن بىرنەشە ومىرتقالارى سىنعان. ءبىراز ۋاقىت بويى قىز بەلىنەن تومەن سال بولىپ، كومادان امان قالدى. ۇزاق ۋاقىت بويى ۆەسنا ەستە ساقتاۋ قابىلەتىنەن زارداپ شەكتى. اپاتتان كەيىن ونى قالپىنا كەلتىرۋ ءۇشىن 16 اي قاجەت بولدى. ۆۋلوۆيچ ءجۇرۋدى قايتا ۇيرەنۋگە ءماجبۇر بولدى جانە ءومىرىنىڭ سوڭىنا دەيىن ول اقساپ ءجۇردى. سونىمەن قاتار ۇشاق اپاتىنىڭ سالدارىنان ۆۋلوۆيچتە جاتىردان تىس جۇكتىلىك بولدى جانە تۇسىك تاستادى، كەيىنىرەك دارىگەرلەر وعان بەدەۋلىك دياگنوزىن قويدى. ۇشاق اپاتىنان كەيىن قىز ستيۋاردەسسا قىزمەتىن جالعاستىرعىسى كەلدى، ءبىراق اۆياكومپانيا ونى كەڭسەگە جۇمىسقا ورنالاستىردى.
لاريسا ساۆيتسكايا
1981-جىلى 24-تامىزدا ان-24رۆ ۇشاعى كومسومولسك-نا-امۋردان بلاگوۆەشەنسك قالاسىنا ۇشتى. بەس شاقىرىم بيىكتىكتە ول تۋ-16ك بومبالاۋشىسىنا تاپ بولدى. بورتتاعى 38 ادامنىڭ ىشىنەن تەك 20 جاستاعى لاريسا ساۆيتسكايا امان قالدى.
ستۋدەنت كۇيەۋىمەن بىرگە ۇيلەنۋ ساپارىنان ۇيلەرىنە ورالىپ كەلە جاتقان. قىز ويانعاننان كەيىن جاقىن جەردە قايتىس بولعان كۇيەۋىنىڭ جاتقانىن كورگەن. قۇتقارۋشىلار لاريسانى اپاتتان كەيىن ەكى كۇن وتكەن سوڭ عانا تاپتى. دارىگەرلەر ساۆيتسكاياعا ميدىڭ شايقالۋى، ومىرتقانىڭ بەس جەردەن جاراقاتتانۋى، قول مەن قابىرعانىڭ سىنۋى دياگنوزىن قويدى. سونىمەن قاتار قىز بارلىق تىستەرىن جوعالتتى.
لاريسا گيننەستىڭ رەكوردتار كىتابىنىڭ رەسەيلىك باسىلىمىنا بىردەن ەكى رەكوردپەن ەندى: ەڭ جوعارى بيىكتىكتەن قۇلاعاننان كەيىن امان قالعان ادام رەتىندە جانە ۇشاق اپاتىنان امان قالعان جانە ەڭ از وتەماقى العان ادام رەتىندە - نەبارى 75 رۋبل.
بايا باكاري
13 جاستاعى فرانسۋز قىز - 2009-جىلى كومور ماڭىنداعى ۇشاق اپاتىنان امان قالعان جالعىز ادام. 2009-جىلى 30-ماۋسىمدا بايا اناسىمەن بىرگە Airbus A310 ۇشاعىمەن اتا-اجەسىنە ۇشىپ بارا جاتقان. ۇشاق قونۋعا بىرنەشە مينۋت قالعاندا ءۇندى مۇحيتىنا قۇلادى. اپات كەزىندە بايا ۇيىقتاپ جاتقان، ونىڭ ويىنشا، ول قانداي دا ءبىر جولمەن يلليۋميناتوردان قۇلاپ كەتتى.
گازەتتەر ونىڭ اكۋلالارى بار موزامبيك بۇعازىندا 12 دەن 14 ساعاتقا دەيىن بولعانىن جازدى، بايانىڭ ءوزى ءومىربايانىندا ول جەردە 9 ساعاتتان ارتىق بولماعانىن ايتادى. باكاريدى بالىقشى قۇتقارىپ، ونى كومور اۋرۋحاناسىنا اپارعان.
ودان باسقا بورتتا 152 ادام بولعان - ەشكىم امان قالعان جوق. ول جايلى ستيۆەن سپيلبەرگ فيلم تۇسىرگىسى كەلدى، ءبىراق باكاري باس تارتتى.
رۋبەن ۆان اسسۋۆ
2010-جىلى 12-+مامىردا Afriqiyah Airways ۇشاعى قونۋ كەزىندە قۇلادى. جالپى بورتتا 104 جولاۋشى بولعان. اپاتتان 9 جاستاعى بالا عانا امان قالدى. اپاتقا ۇشىراعان ۇشاقتىڭ بورتىندا 10 ەلدىڭ جولاۋشىلارى بولدى.
رۋبەن وتباسىمەن بىرگە وڭتۇستىك افريكاعا ساياحاتتاپ بارا جاتقان. بۇل اپاتتان بالانىڭ اكەسى، اناسى جانە اعاسى قازا تاپتى. رۋبەن بىردەن ەسىنەن تانىپ قالدى. ول ەكى اياعىن سىندىرىپ الدى، ءبىراق وپەراتسيادان كەيىن ولاردى قالپىنا كەلتىردى. ول قازىر نيدەرلاندىدا تاتەسىمەن جانە اعاسىمەن بىرگە تۇرادى.
تەرگەۋ بارىسىندا ۇشاق قونايىن دەپ جاتقاندا قالىڭ تۇمانعا بايلانىستى ەشتەڭە كورىنبەگەنى انىقتالدى. ەكيپاج اۆتوپيلوتتى اجىراتىپ، قولمەن قونۋعا تىرىسقان، ءبىراق سودان كەيىن ەكىنشى اينالىمعا شىعۋ تۋرالى شەشىم قابىلداپ، اۆتوپيلوتتى قايتا قوسقان، ءبىراق بۇل شەشىمدى ۇشقىشتار تىم كەش قابىلدادى.
