جالعان شەتەل ۆاليۋتاسىن وتكىزۋ فاكتىلەرى جيىلەپ كەتكەن - قارجىلىق مونيتورينگ اگەنتتىگى

استانا. KAZINFORM - قارجىلىق مونيتورينگ اگەنتتىگى جالعان شەتەل ۆاليۋتاسىن وتكىزۋ فاكتىلەرىنىڭ جيىلەپ كەتكەنى جايلى حابارلادى.

ماسەلەن، الماتى ق. جالعان 100 دوللارلىق كۋپيۋرالاردى ساتۋمەن اينالىسقان تۇلعالار توبى انىقتالدى. قىلمىسقا قاتىسۋشىلاردىڭ ءبىرىنىڭ تۇرعىلىقتى جەرىن ءتىنتۋ بارىسىندا 149 دانا (14900 ا ق ش دوللارى) جالعان دوللار تابىلدى. قۇقىق بۇزۋشىلار ۇستالىپ، سوت ولارعا قاماۋدا ۇستاۋ تۇرىندەگى بۇلتارتپاۋ شاراسىن سانكتسيالادى.

سونىمەن قاتار باتىس قازاقستان وبلىسىندا ق م ا پوليتسيامەن بىرلەسىپ جالعان ۆاليۋتانى وتكىزۋ فاكتىسى انىقتادى. ءبىر توپ ادام ورال قالاسىنداعى لوتەرەيا كلۋبتارىنىڭ بىرىندە جالعان 25000 ا ق ش دوللارى مەن 10000 يەۆرو وتكىزگەن دەگەن كۇدىككە ىلىكتى.

كۇدىكتىلەر ءباس تىگۋ ماقساتىندا بۇل قاراجاتپەن شوتتارىن تولىقتىرعان.

جالعان اقشانى ساتۋشىعا قاتىستى سوتتىڭ سانكتسياسىمەن « قاماۋدا ۇستاۋ» تۇرىندەگى بۇلتارتپاۋ شاراسى تاڭدالدى. ق پ ك-نىڭ 201-بابى تارتىبىندەگى وزگە دە اقپارات جاريا ەتۋگە جاتپايدى.

ايتا كەتەيىك، جىل باسىنان بەرى قازاقستان اۋماعىندا اينالىمنان 1060 جالعان بانكنوت تاركىلەندى، ونىڭ ىشىندە ۇلتتىق ۆاليۋتادا 647000 تەڭگە سوماسىنا 141 دانا، 90400 ا ق ش دوللارىنا 905 كۋپيۋرا، 2000 ەۋروعا 4 كۋپيۋرا، 1000 يۋان سوماسىنا 10 كۋپيۋرا. الىنعان جالعان بانكنوتتاردىڭ جالپى سوماسى 43 ميلليون تەڭگەدەن اسادى.

بۇعان دەيىن 2024 -جىلى جالعان كۋپيۋرالاردى جاساپ، وتكىزگەنى ءۇشىن 8 ادام 5 جىلدان 6 جىلعا دەيىنگى مەرزىمگە باس بوستاندىعىنان ايىرىلدى.