جالعا بەرىلەتىن جەڭىلدىكتى تۇرعىن ءۇي باعدارلاماسىن كەڭەيتۋ قاجەت - ولجاس بەكتەنوۆ
استانا. KAZINFORM - پرەمەر-مينيستر ولجاس بەكتەنوۆ تۇرعىن ءۇي قۇرىلىسىن ودان ءارى دامىتۋ جانە باسپانا قولجەتىمدىلىگىن ارتتىرۋ ماسەلەلەرى بويىنشا كەڭەس وتكىزدى.

مەملەكەت باسشىسىنىڭ Ana tili گازەتىنە بەرگەن سۇحباتىندا ايتقان تاپسىرمالارىن ورىنداۋ بويىنشا جۇمىس بارىسى قارالدى. كەڭەسكە ونەركاسىپ جانە قۇرىلىس، ۇلتتىق ەكونوميكا، قارجى مينيسترلىكتەرىنىڭ، «وتباسى بانك» ا ق، «سامۇرىق-قازىنا» ءۇ ا ق» ا ق، «بايتەرەك» ۇ ب ح» ا ق باسشىلىعى قاتىستى.
«وتباسى بانكىن» دامۋ ينستيتۋتىنا اينالدىرۋ جانە سالانى ودان ءارى دامىتۋ ءۇشىن جەكە قاراجاتتى تارتۋ جونىندەگى جۇمىستى جانداندىرۋ تاسىلدەرى، سونداي-اق جەڭىلدىكتى باعدارلامالاردى قارجىلاندىرۋ، ونىڭ ىشىندە ونەركاسىپ كاسىپورىندارى قىزمەتكەرلەرىن قولداۋ جانە جاڭا ونىمدەردى شىعارۋ بويىنشا ۇسىنىستار تالقىلاندى. بۇگىندە «قاراجانباسمۇناي»، «شۇباركول كومىر»، «ەۋروازياتتىق ەنەرگەتيكالىق كورپوراتسيا»، «س س ك و ب» ، «قازحروم» ت ۇ ك»، «قازاقستان اليۋمينيى»، «قازاقستان ەلەكتروليز زاۋىتى» سياقتى ءىرى كاسىپورىندار جانە باسقا دا ۇيىمدارمەن جۇمىسشى كاسىپ ماماندارى وتباسىلارىنىڭ تۇرمىسىن جاقسارتۋ جۇمىستارى باستالدى.
پرەمەر-مينيستر جۇمىسشى ماماندىقتارى جىلى اياسىندا تەحنيكالىق ماماندارعا ارنالعان يپوتەكالىق جانە جالعا بەرىلەتىن جەڭىلدىكتى تۇرعىن ءۇي باعدارلاماسىن كەڭەيتۋ قاجەتتىگىن اتاپ ءوتتى. بانكتىڭ ترانسفورماتسياسى ونىڭ «ءبىر تەرەزە» قاعيداتى بويىنشا مۇقتاج ازاماتتاردى باسپانامەن قامتاماسىز ەتۋ جۇمىسىن كۇشەيتۋگە جانە جالپى العاندا ەلىمىزدىڭ ەكونوميكاسىن دامىتۋعا باعىتتالعان.
ونەركاسىپ جانە قۇرىلىس مينيسترلىگىنىڭ دەرەكتەرى بويىنشا، 2024-جىلدىڭ قورىتىندىسىندا قازاقستاندا رەكوردتىق 18,9 ميلليون شارشى مەتر تۇرعىن ءۇي پايدالانۋعا بەرىلدى، بۇل وتكەن جىلمەن سالىستىرعاندا %6,4 عا ارتىق. سالانىڭ ناقتى كولەم يندەكسى ءبىر جىلدا %113,1 دى قۇرادى. 2029-جىلعا قاراي 111 ميلليون شارشى مەترگە جەتكىزۋ جونىندەگى پرەزيدەنت قويعان مىندەتتەردى ورىنداۋ بويىنشا جۇمىس جۇرگىزىلۋدە.
مەملەكەتتىك قولداۋ شارالارى شەڭبەرىندە ازاماتتارعا جالعا بەرىلەتىن، نەسيەلىك باسپانامەن قامتاماسىز ەتۋى، «2-10-20»، «5-10-20» جانە باسقا دا باعدارلامالار ىسكە اسىرىلۋدا. 2024-جىلى «وتباسى بانكى» 1,29 تريلليون تەڭگە سوماسىندا 71452 نەسيە بەردى، ونىڭ %39,8 ى باستاپقى تۇرعىن ءۇي ساتىپ الۋعا ارنالعان. «وتاۋ» جانە «ناۋرىز» باعدارلامالارى بويىنشا جالپى 251,9 ميلليارد تەڭگەگە 10003 قارىز بەرىلدى.
بۇعان دەيىن وتباسى بانك جۇمىسشىلاردى باسپانامەن قامتۋدىڭ ءۇش جولىن ۇسىندى.