جالعا بەرىلەتىن پاتەردىڭ ەڭ ارزانى - تۇركىمەنستاندا، ەڭ قىمباتى - قازاقستاندا

استانا. قازاقپارات - Asia-Plus باسىلىمى دۋشانبە، تاشكەنت، بىشكەك، استانا جانە اشحابادتا ءبىر، ەكى جانە ءۇش بولمەلى پاتەرلەردى جالعا الۋ باعاسىن انىقتادى. وسى ماقساتتا اعىمداعى جىلدىڭ تامىز جانە قىركۇيەك ايلارىندا جالعا بەرىلەتىن سايتتاردا جاريالانعان 50 حابارلاندىرۋ زەرتتەلدى.

سالىستىرۋعا ىڭعايلى بولۋ ءۇشىن باعالار ا ق ش دوللارىمەن بەرىلگەن.

ورتالىق ازيانىڭ استانالارى اراسىندا ەڭ ارزان تۇرعىن ءۇيدى جالعا الۋ تۇركىمەنستان استاناسى اشحابادتا تىركەلدى. وندا 40 شارشى مەترلىك ءبىر بولمەلى پاتەردى ورتاشا ەسەپپەن 240 دوللارعا جالعا الۋعا بولادى. اشحابادتا ەكى بولمەلى پاتەردى جالداۋ ورتاشا ەسەپپەن $320، ال ءۇش بولمەلى پاتەردى جالداۋ $410 تۇرادى.

تاجىكستان استاناسى دۋشانبەدە ءبىر بولمەلى پاتەردى جالعا الۋدىڭ ورتاشا باعاسى اۋدان مەن جاعدايعا بايلانىستى ايىنا 160-360 دوللار ارالىعىندا. ەكى بولمەلى جانە ءۇش بولمەلى پاتەرلەر ورتاشا ەسەپپەن 500 دوللاردان 700 دوللارعا دەيىن جالعا بەرىلەدى.

جالداۋ اقىسىنىڭ ەڭ جوعارى باعاسى قازاقستاننىڭ استاناسى استانا مەن قىرعىزستان استاناسى بىشكەكتە. مۇندا ءبىر بولمەلى پاتەردىڭ ورتاشا جالداۋ اقىسى 440-520 دوللار، ەكى بولمەلى پاتەر 670-1520 دوللار، ءۇش بولمەلى پاتەر 1140-2130 دوللار ارالىعىندا.

تاشكەنتتەگى جالعا الۋ باعاسى بىشكەكتەگىگە جاقىن. مۇندا ءبىر بولمەلى پاتەردى جالداۋدىڭ ورتاشا باعاسى اۋدان مەن جاعدايعا بايلانىستى 420 دوللار، ەكى بولمەلى پاتەر 700 دوللار، ءۇش بولمەلى پاتەر 1000 دوللاردى قۇرايدى.

زەرتتەۋ ناتيجەلەرى بويىنشا، ورتالىق ازيانىڭ بارلىق ەلدەرىندە بايقالعان جالعا الۋ باعاسىنىڭ ءوسۋى، ەڭ الدىمەن، تۇرعىندار مەن قوناقتار تاراپىنان سۇرانىستىڭ ارتۋى جانە وقۋ جىلىنىڭ باستالۋىمەن بايلانىستى ەكەنى ايتىلدى.