جالاقىم 1 ميلليون تەڭگەدەن استى: بورتسەرىك قىزمەتىنىڭ قۇپياسى

  7-جەلتوقسان - ب ۇ ۇ باس اسسامبلەياسىنىڭ شەشىمىمەن حالىقارالىق ازاماتتىق اۆياتسيا كۇنى دەپ بەلگىلەنگەن. اۆياتسيا - كوبىمىزگە قىزىق ءارى تاڭعاجايىپ سالا.

اسپان مەن جەردىڭ اراسىن جول قىپ، كەڭىستىكتە ەركىن قالىقتاعان ۇشاقتارعا قىزىقپاعان ادام كەمدە- كەم شىعار. بىرىنە ارمان بولعان، ەندى ءبىرىنىڭ ورىندالعان ماقساتىنا اينالعان قىزمەتتىڭ قۇپيالارى تۋرالى Bugin.kz ءتىلشىسى بورتسەرىك مامانمەن سۇحباتتاستى. بورتسەرىك اتانۋ ءۇشىن نە ىستەۋ كەرەك، نەشە ءتىل بىلگەن ءجون جانە قىزمەتتىڭ قيىندىقتارى مەن قىزىقتارى تۋرالى سۇراقتارىمىزعا "تراپ دو مەچتى" كىتابىنىڭ اۆتورى، اۆياتسيا سالاسىندا 7 جىلدىق تاجىريبەسى بار جادىرا ءالىمجانوۆا جاۋاپ بەردى.

- ستيۋاردەسسا بولۋ ءۇشىن جالپى تالاپتار قانداي؟

- ءار اۋەكومپانيانىڭ بورتسەرىككە قوياتىن تالابى ءارتۇرلى. دەگەنمەن بارىنە ورتاق باستى تالاپتار بار. بورتسەرىك تاڭداعاندا ۇمىتكەردىڭ بويىنا، ءتىل مەڭگەرگەنىنە، قىزمەت كورسەتۋ سالاسىندا ەڭبەك ءوتىلىنىڭ بولۋىنا قارايدى. سونىمەن قاتار توپتا جۇمىس ىستەي الۋ قابىلەتى، ياعني ادامدارمەن كوممۋنيكاتسياسى باستى ورىندا بولادى.

- بۇل سالانى مەڭگەرۋ ءۇشىن جوعارى وقۋ ورنىندا وقۋ مىندەت پە؟

- جوق، ارنايى وقۋدىڭ كەرەگى جوق. ءتىل بىلگەنىڭىز جانە جۇمىسقا قابىلداۋ ىرىكتەۋىنەن وتكەنىڭىز عانا ماڭىزدى.

- ىرىكتەۋ قالاي وتەدى، قانشا جاستاعى ادامدار قابىلدانا الادى؟

- ىرىكتەۋ ءار اۋەكومپانيادا ءارتۇرلى وتەدى. جاسقا قاتىستى ەشقانداي شەكتەۋ جوق. تەك وتاندىق “SCAT” كومپانياسىندا 25 جاسقا دەيىنگى ادامداردى قابىلدايدى. باسقا كومپانيالاردا شەكتەۋ جوق. مىسالى الەمگە تانىمال QATAR اۋەكومپانياسىنا 35 جاستاعى قۇربىم جۇمىسقا قابىلداندى.

- اعىلشىن ءتىلى قاي دەڭگەيدە بولۋى قاجەت؟ ۇمىتكەر جالپى قانشا ءتىل بىلگەنى دۇرىس؟

- قازاقستاندىق كومپانيالار ءۇشىن اعىلشىن ءتىلىنىڭ Pre-intermediate دەڭگەيى جەتكىلىكتى. ال شەتەلدىك اۋە كومپانيالارى Intermediate دەڭگەيىنەن جوعارى بولعانىن تالاپ ەتەدى. قانشالىقتى ءتىل بىلسەڭ، سونشالىقتى جاقسى. سەبەبى كوپ ءتىل بىلگەن سايىن جۇمىسقا كىرۋ مۇمكىندىگى ارتادى.

- بايقاۋىمشا، شەتەلدىك اۆياكومپانيالاردا بورتسەرىكتەردىڭ سىرتقى پىشىنىنە كوپ ءمان بەرمەيدى. ءبىزدىڭ ەلدە ماماننىڭ كەلبەتى قانشالىقتى ماڭىزدى؟

- قازاقستاندىق جانە اراب اۋەكومپانيالارى سىرت كەلبەتتىڭ ادەمى ءارى سىمباتتى بولعانىنا ءمان بەرەدى. ال ەۋروپا، امەريكادا 50 جاستاعى بورتسەرىكتەر دە جۇمىس ىستەيدى. ءتىپتى، بەت البەتىن ارلەمەي، تەك قىزمەتتىك كيىمىن كيىپ جۇمىس اتقارا بەرەدى.

- اۋە كومپانيالارىنىڭ اڭگىمەلەسۋىنەن قالاي ءساتتى وتۋگە بولادى؟

- اڭگىمەلەسۋدەن ءساتتى ءوتۋ ءۇشىن تىڭعىلىقتى دايىندالۋ كەرەك. سىرت كەلبەتتەن باستاپ، سۇراقتارعا قالاي جاۋاپ بەرەتىنىڭدى ءبىلىپ، سۇحباتتىڭ قالاي وتەتىنىن الدىن الا زەرتتەگەن ءجون. ءساتتى ءوتۋدىڭ كىلتى - پسيحولوگيالىق دايىندىق. اۋە كومپانيالار، بورتسەرىك قىزمەتى تۋرالى كوبىرەك اقپارات ءبىلىپ بارعان دۇرىس.

- بورتسەرىكتىك قىزمەت سىزگە قانداي مۇمكىندىكتەر سىيلادى؟

- بورتسەرىك بولىپ 3 جىل قازاقستاندىق Air Astana اۋەكومپانياسىندا جانە 4 جىل Etihad Airways كومپانياسىندا قىزمەت ەتتىم. بۇل جۇمىستىڭ ماعان سىيلاعان ەڭ ۇلكەن مۇمكىندىگى - ساياحات. Etihad-تا ىستەپ جۇرگەندە الەمنىڭ 5 ماتەريگىنە تابانىم ءتيدى. 60 تان اسا ەل كورىپ، جەر ارالادىم. ارينە، وتە جاقسى تابىس تاپتىم. تۇراتىن جەر مەن تەگىن مەديتسينالىق ساقتاندىرۋدى دا بەردى. شەتەلدە تۇرىپ كوردىم، ەموتسياعا تولى كۇشتى كەزەڭ بولدى. ماماندىعىمنىڭ ارقاسىندا پاتەر الىپ، اتا- اناما دا كومەكتەسە الدىم. بورتسەرىك بولعانىمنىڭ ماعان سىيلاعان مۇمكىندىكتەرى وتە كوپ.

- ەندى جۇمىسىڭىزدا كەزدەسەتىن قيىندىقتاردى دا اتاي كەتسەڭىز؟

- كەز كەلگەن جۇمىستىڭ وزىنە لايىق قيىندىعى بولاتىنى بەلگىلى. سول سياقتى قيىندىقتار مەنىڭ دە جۇمىسىمدا دا بولدى. مىسالى، كەيدە تاڭعى 4 تە ۇشۋعا تۋرا كەلەدى. تۇنگى رەيستەر دە بولادى. سونداي- اق ۇزاق ۋاقىت ۇشاتىن رەيستەر دە بولادى. Etihad- تا ىستەگەندە لوس اندجەلەسكە 17 ساعات ۇشقانىم ەسىمدە. ارينە، مۇنداي رەيستەردە دەمالاتىن ورىندارىمىز بار. دەگەنمەن ءبىر ۇشاقتىڭ ىشىندە ۇزاق ۋاقىت بولۋ - ءبارىبىر قيىنداۋ.

- بورتسەرىك بولۋ ءۇشىن ادام بويىندا قانداي قاسيەتتەر بولۋى كەرەك؟

- ول ءۇشىن، الدىمەن، جۇزىڭنەن نۇرىڭ شاشىلىپ، الدىڭنان كەزدەسكەن ادامعا كۇلىپ جاۋاپ بەرە الۋىڭ كەرەك. سونىمەن قاتار ءبىر كوماندادا جۇمىس ىستەيتىن ادامدارمەن ءتىل تابىسا الۋىڭىز قاجەت. بورتسەرىك قىزمەتىندە وتە كوپ ادام جۇمىس ىستەيدى. ءبىر اداممەن بىرنەشە رەيستە بىرگە بولۋىڭ مۇمكىن ەمەس. ءار رەيستە ءارتۇرلى ادام كەزدەسەتىندىكتەن، قارىم- قاتىناس ورناتۋعا قابىلەتتى بولعانى جاقسى.

جۇلدىز مۇقانوۆا

bugin.kz