جامبىل وبلىسىندا 34 ميلليون تەڭگەنىڭ مالى ۇرلاندى
استانا. KAZINFORM - سوڭعى 4 ايدىڭ ىشىندە بايزاق اۋدانىنىڭ اۋىل تۇرعىندارى 400 گە جۋىق قوي-ەشكىسىنەن ايىرىلعان. مال ۇرلىعىنا قاتىسى بار دەگەن كۇدىكپەن 4 ادام ۇستالدى.
بيىل شىلدە مەن قازان ايلارى ارالىعىندا بايزاق اۋدانىنىڭ اۋىلدارىندا بىرنەشە رەت مال ۇرلىعى تىركەلدى. ۇرىلار مالدى جايىلىمنان دا، قورادان دا ايداپ اكەتكەن.
وبلىستىق پوليتسيا دەپارتامەنتىنىڭ مالىمەتىنشە، بارلىعى 384 باس ۇساق مال ۇرلانعان. كەلتىرىلگەن شىعىن كولەمى - 34 ميلليون تەڭگە.
كريمينالدىق پوليتسيا قىزمەتكەرلەرى 4 كۇدىكتىنى ۇستادى. قازىر تەرگەۋ ولاردىڭ مال ۇرلىعىنىڭ ءتورت دەرەگىنە قاتىسى بار-جوعىن انىقتاپ جاتىر. ءىس بويىنشا زاتتاي ايعاقتار جينالىپ، كۋاگەرلەر مەن كۇدىكتىلەردەن جاۋاپ الىنعان.
اسا ءىرى مولشەردە بىرنەشە رەت مال ۇرلاۋ دەرەگى بويىنشا سوتقا دەيىنگى تەرگەۋ باستالدى. ءتورت كۇدىكتى دە ۋاقىتشا ۇستاۋ يزولياتورىنا قامالدى. قازىر پوليتسيا كۇدىكتىلەردىڭ وڭىردەگى وسىعان ۇقساس وزگە دە مال ۇرلىعىنا قاتىسى بار-جوعىن تەكسەرىپ جاتىر.
ەسكە سالا كەتەيىك، اباي وبلىسىنىڭ بەسقاراعاي اۋدانىندا مال ۇرلىعىمەن اينالىسقان 11 ادام ءارتۇرلى مەرزىمگە باس بوستاندىعىنان ايىرىلدى.
جالپى جىل باسىنان بەرى قازاقستاندا مال ۇرلىعىنا قاتىستى 460 قا جۋىق كۇدىكتى ۇستالىپ، 3 مىڭنان استام مال زاڭدى يەلەرىنە قايتارىلدى.
