جاپپاي جول اپاتىنا ۇشىراعان كولىك يەلەرىنە قانداي وتەماقى بەرىلەدى
استانا. KAZINFORM - جاپپاي كولىك اپاتىنا ۇشىراعان كولىك يەلەرى قانداي وتەماقى الا الادى. بۇل سۇراققا «ەۆرازيا» ساقتاندىرۋ كومپانياسىنىڭ باسپا ءسوز قىزمەتى جاۋاپ بەردى.
- جاپپاي جول-كولىك وقيعاسىنان زارداپ شەككەن جۇرگىزۋشىلەر ساقتاندىرۋ تولەمىن كاسكو ەرىكتى كەشەندى ساقتاندىرۋ شارتى بويىنشا نەمەسە اۆتوكولىكتى مىندەتتى ساقتاندىرۋ شەڭبەرىندە الا الادى. بۇگىنگە دەيىن ءىرى كولىك اپاتىنان زارداپ شەككەن ءۇش كولىك يەسى «ەۆرازيا» ساقتاندىرۋ كومپانياسىنا كەشەندى ساقتاندىرۋ باعدارلاماسى بويىنشا تولەم الۋ ءۇشىن جۇگىندى. كاسكو ساقتاندىرۋ باعدارلاماسى اياسىندا زاقىمدانعان كولىك قۇرالىنىڭ جۇرگىزۋشىسى جول-كولىك وقيعاسىنا كىنالى نەمەسە كىناسىز ەكەنىنە قاراماستان، ءتىپتى كەيىننەن كىنالى تۇلعا انىقتالماعان جاعدايدا دا ساقتاندىرۋ تولەمىن الا الادى، - دەيدى كومپانيانىڭ باسپا ءسوز قىزمەتى.
الايدا مىندەتتى ساقتاندىرۋ ارقىلى وتەماقى الاتىن ادامدار مىنا جايدى ەسكەرۋى كەرەك بولادى.
- كولىك قۇرالىن مىندەتتى ساقتاندىرۋ شەڭبەرىندە كىنالىنىڭ ساقتاندىرۋ كومپانياسى جابىرلەنۋشىگە زاڭدا بەلگىلەنگەن شەكتى مولشەر - 2 مىڭ ا ە ك نەمەسە 7,864 ميلليون تەڭگەگە دەيىن وتەماقى تولەپ بەرەدى. بۇل سوما كىنالى جۇرگىزۋشىنىڭ ارەكەتى ناتيجەسىندە زارداپ شەككەندەردىڭ بارلىعىنا بولىنەدى جانە بارلىق شىعىندى جاپپاۋى مۇمكىن. جابىرلەنۋشىلەر قالعان سومانى كىنالى ازاماتتان سوت ارقىلى وندىرە الادى. اتاپ وتەرلىك جايت، جابىرلەنۋشىلەر سانى جانە سۇرالاتىن قارجى كوپ بولعان جاعدايدا جەكە تۇلعادان تولىق سومانى ءوندىرىپ الۋى ەكىتالاي. پوليتسيا بارلىق ءمان-جايدى جانە جاپپاي كولىك اپاتىنا سەبەپكەر بولعان جۇرگىزۋشىنى انىقتاۋى كەرەك. ەگەر كىنالى انىقتالماسا، كەشەندى ساقتاندىرۋ پوليسى جوق جۇرگىزۋشىلەر كولىكتى ءوز قاراجاتىنا جوندەتۋگە ءماجبۇر بولادى، - دەلىنگەن حابارلامادا.
ودان بولەك جاپپاي كولىك اپاتىنا جاۋااپكەرشىلىك جولدى كۇتىپ ۇستاۋعا جاۋاپتى مەكەمەگە دە جۇكتەلەتىن كەز بولادى.
- جول قوزعالىسى زاڭناماسىنا سايكەس، جولداردى كۇتىپ ۇستاۋعا جاۋاپتى ۇيىم قاۋىپسىزدىكتى قامتاماسىز ەتۋگە، ونىڭ ىشىندە كوكتايعاققا قارسى شارالاردى جاساۋعا مىندەتتى. ەگەر ۇيىم ءوز مىندەتتەرىن ورىنداماعانى سەبەپتى جول-كولىك وقيعاسى بولعانى انىقتالسا، زارداپ شەككەن كولىك يەلەرى توپتىق شاعىم تۇسىرۋگە قۇقىلى. الايدا بۇل جاعدايدا كەشەندى ساقتاندىرۋ بويىنشا ساقتاندىرۋ تولەمىن الۋ كەزىندەگىدەي ءبارى جەڭىل بولمايدى. جابىرلەنۋشى سوت بارىسىندا كوپ ۋاقىتىن جانە زاڭگەر قىزمەتىنە قوماقتى قاراجات جۇمساۋى كەرەك بولادى، - دەلىنگەن ساقتاندىرۋ كومپانياسىنىڭ تۇسىندىرمەسىندە.
«ەۆرازيا» سك ستاتيستيكاسىنا سايكەس، جول- كولىك وقيعالارىنىڭ %90 ىندا ەكى كولىك سوقتىعىسقان بولادى. قالعان %10 جاعدايدا ءۇش نەمەسە ودان دا كوپ كولىك اپاتقا ۇشىراعانى تىركەلەدى. ال جاپپاي كولىك اپاتى - سيرەك كەزدەسەتىن جاعداي.
ەستەرىڭىزگە سالا كەتەيىك، 3 - قاڭتاردا اقمولا وبلىسىندا استانا- شۋچينسك تاس جولىندا 95 كولىك جاپپاي جول اپاتىنا ۇشىراپ، 20 ادام مەديتسينالىق كومەككە جۇگىنگەن بولاتىن.
