جاڭاوزەندە ءبىر مينۋتتا 5000 ءسوز وقيتىن وقۋشى تۇرادى
جاڭاوزەن قالاسىنىڭ وقۋشىسى ايگەرىم باقىت ەرەكشە قابىلەتىمەن ەل نازارىن اۋداردى. ەرەكشە وقۋشى جايىندا «قازاقستان» تەلەارناسى ارنايى سيۋجەت ازىرلەگەن، دەپ حابارلادى turkystan.kz.
ول ءبىر مينۋتتا 5 مىڭ ءسوز وقي الادى جانە ءبىر كىتاپتى نەبارى جارتى ساعاتتا اياقتايدى. مۇنداي ناتيجە جىلدام وقۋ تەحنيكاسىن مەڭگەرۋدىڭ ارقاسىندا مۇمكىن بولعان. قابىلەتى العاش رەت 4-سىنىپتا بايقالعان ايگەرىم سول كەزدە مينۋتىنا 700-800 ءسوز وقىعان. ۋاقىت وتە كەلە ءتۇرلى جاتتىعۋلار مەن ادىستەر ارقىلى بۇل كورسەتكىشتى بىرنەشە ەسە ارتتىرعان. بۇگىندە ول ىشتەي وقىپ، ءماتىننىڭ مازمۇنىن تولىق ءتۇسىنىپ، ايتىپ بەرە الادى.
قازىرگى ۋاقىتتا 100 دەن استام كىتاپتى وقىپ ۇلگەرگەن دارىندى وقۋشى اعىلشىن تىلىندەگى ادەبيەتتەرگە ەرەكشە ءمان بەرىپ ءجۇر. دارىگەرلەردىڭ ايتۋىنشا، جىلدام وقۋ تەحنيكاسى كوزدىڭ كورۋ قابىلەتىنە دە وڭ اسەر ەتەدى.
ءبىلىم مينيسترلىگىنىڭ مالىمەتىنشە، ايگەرىمگە تەڭ كەلەتىن وقۋشى ازىرگە ەلىمىزدە جوق.
ايتا كەتەيىك، الەمدىك رەكورد - ءبىر مينۋتتا 163333 ءسوز وقىعان 16 جاستاعى ۋكراينالىق قىزعا تيەسىلى.
