جاڭاوزەندە ەرەۋىل ۇيىمداستىرۋعا ارەكەتتەنگەن قىلمىستىق توپتىڭ جولى كەسىلدى
اقتاۋ. KAZINFORM - ۇلتتىق قاۋىپسىزدىك كوميتەتىنىڭ ماڭعىستاۋ وبلىسى بويىنشا دەپارتامەنتى ىشكى ىستەر ورگاندارىمەن بىرلەسىپ، جاڭاوزەن قالاسىندا ەرەۋىل ۇيىمداستىرۋعا ارەكەتتەنگەن قىلمىستىق توپتىڭ ارەكەتىنە توسقاۋىل قويدى.
رەسمي مالىمەتتەرگە سۇيەنسەك، توپ مۇناي-گاز سالاسىنداعى مەردىگەر كومپانيالاردىڭ ءبىرىنىڭ باسشىلىعىمەن ءسوز بايلاسقان. ولار كاسىپورىن جۇمىسشىلارىن جاپپاي نارازىلىق اكسيالارىنا شىعۋعا يتەرمەلەپ، تاپسىرىس بەرۋشى «وزەن مۇناي گاز» ا ق- دان قوسىمشا قارجى الۋعا تىرىسقان.
سونداي-اق دەرەككوزدەر تالاپتارى ورىندالماعان جاعدايدا توپ مۇشەلەرى مۇنايشىلاردىڭ نارازىلىعىن پايدالانىپ، جاڭاوزەندە 2011-جىلعى وقيعالاردى قايتالاۋعا ارەكەتتەنۋى مۇمكىن بولعانىن حابارلايدى.
كۇشتىك قۇرىلىمداردىڭ ۋاقتىلى ءارى ۇيلەسىمدى ارەكەتتەرىنىڭ ارقاسىندا ادام ولىمىنە، جاپپاي تارتىپسىزدىك پەن توناۋشىلىققا جول بەرىلمەي، قىلمىستىق توپ ۇستالدى.
بۇعان دەيىن، ۇ ق ك 24 قىلمىستىق توپتىڭ زاڭسىز ارەكەتىنە توسقاۋىل قويعانى تۋرالى جازدىق.
