جانارماي باعاسىنىڭ وزگەرۋى تاۋار باعاسىنا اسەر ەتۋى مۇمكىن - ۇلتتىق بانك

ونىڭ ايتۋىنشا، قىركۇيەكتە جانار-جاعارماي باعاسىنىڭ جىلدىق ءوسىمى شامامەن %10,4-10,5 بولعان. ال قازاندا بۇل كورسەتكىش %8,4-8,5 عا دەيىن تومەندەگەن. بۇعان وتكەن جىلدىڭ قازان ايىنداعى وتىن باعاسىنىڭ ەداۋىر ءوسۋى سالىستىرۋ بازاسىنان شىعۋى دا اسەر ەتكەن.

ول جانارماي باعاسىنىڭ وزگەرۋى تۇتىنۋ سەبەتىنە تىكەلەي اسەر ەتۋمەن شەكتەلمەيتىنىن اتاپ ءوتتى. بەنزين مەن ديزەل تاسىمال قۇنىنا ىقپال ەتەدى. ال لوگيستيكالىق شىعىنداردىڭ ارتۋى باسقا تاۋارلار مەن قىزمەتتەردىڭ باعاسىنان كورىنۋى مۇمكىن.

- ءبىز ءۇشىن باعانىڭ تىكەلەي ۇلەسىنەن گورى، ونىڭ باسقا سالالارعا تارايتىن جاناما اسەرى ماڭىزدى، - دەدى ۇلتتىق بانك ءتوراعاسىنىڭ ورىنباسارى.

ونىڭ ايتۋىنشا، رەتتەۋشى بەنزين باعاسىنىڭ وسۋىنە بازالىق مولشەرلەمە ارقىلى تىكەلەي جاۋاپ بەرمەيدى. نەگىزگى نازار جانارماي قىمباتتاعاننان كەيىن وزگە تاۋارلار مەن قىزمەتتەردىڭ باعاسى قالاي وزگەرەتىنىنە اۋدارىلادى.

اقىلجان بايماعامبەتوۆ جانارماي قۇنىنىڭ ءوسۋىن كەلەسى جىلعا ارنالعان ينفلياتسيالىق تاۋەكەلدەردىڭ ءبىرى رەتىندە اتادى.

سونىمەن قاتار ول قازاقستاندا جانارماي ءوندىرىسىنىڭ تيىمدىلىگىن ارتتىرۋ، وتاندىق وندىرۋشىلەردى ققاجەتتى شيكىزاتپەن قامتاماسىز ەتۋ جانە سالاداعى مۇددەلەر تەڭگەرىمىن ساقتاۋ ماڭىزدى ەكەنىن ايتتى.

ايتا كەتەيىك، بۇعان دەيىن، بەنزين وندىرىسىنەن باستاپ تۇتىنۋشىعا دەيىنگى بۇكىل پروتسەسس تەكسەرىلىپ جاتقانىن جازعان ەدىك.