جاڭا وقۋ جىلىندا وقۋشىلار قانداي كۋرستاردى مىندەتتى تۇردە وقيدى

- قازىرگى ۋاقىتتا ەلىمىزدەگى 8 مىڭنان استام مەكتەپتە 4,1 ميلليون وقۋشى ءبىلىم الادى. بيىل 380 مىڭ بالا ءبىرىنشى سىنىپقا قابىلداناتىن بولادى. 11-سىنىپقا 227 مىڭ وقۋشى كوشتى. وتكەن وقۋ جىلىندا 230 مىڭنان استام وقۋشى مەكتەپ ءبىتىردى. وقۋ-اعارتۋ مينيسترلىگى ءبىلىم بەرۋ جۇيەسىنىڭ بارلىق دەڭگەيىندە جاڭا كونستيتۋتسيا قاعيداتتارىن كەزەڭ-كەزەڭىمەن ەنگىزۋ بويىنشا كەشەندى جۇمىستى جۇيەلى تۇردە جۇزەگە اسىرىپ جاتىر. قازىرگى ۋاقىتتا ءبىلىم بەرۋدىڭ مەملەكەتتىك جالپىعا مىندەتتى ستاندارتتارى، ۇلگىلىك وقۋ جوسپارلارى جانە وقۋ باعدارلامالارى جاڭا كونستيتۋتسيا نورمالارىنا سايكەس قايتا قارالدى، - دەدى ول.

ءمينيستردىڭ دەرەگىنشە، جاڭا وقۋ جىلىنان باستاپ ءبىلىم بەرۋ مازمۇنى ءبىرقاتار جاڭا مىندەتتى وقۋ كۋرسىمەن تولىقتىرىلادى. 5-7-سىنىپ وقۋشىلارى ءۇشىن «كونستيتۋتسيا نەگىزدەرى» ءپانى ەنگىزىلەدى. 8-11-سىنىپتاردا «زاڭ جانە ءتارتىپ»، 5-11-سىنىپ وقۋشىلارى ءۇشىن «جەكە قاۋىپسىزدىك» وقۋ كۋرستارى مىندەتتى بولدى.

- بۇعان دەيىن تاڭداۋ ءپانى رەتىندە وقىتىلىپ كەلگەن «قۇقىق نەگىزدەرى» كۋرسى بارلىق وقۋشىلار ءۇشىن مىندەتتى پانگە اينالادى جانە مازمۇنى جاڭا كونستيتۋتسيا قاعيداتتارىنا سايكەستەندىرىلدى. ۇلگىلىك وقۋ جوسپارلارىنىڭ قۇرىلىمى وڭتايلاندىرىلدى. وقۋشىلاردىڭ بارلىق وقۋ پاندەرىنە تولىق قولجەتىمدىلىگىن قامتاماسىز ەتۋ ماقساتىندا قىسقارتىلعان ۇلگىلىك وقۋ جوسپارلارى الىنىپ تاستالدى، - دەدى جۇلدىز سۇلەيمەنوۆا.

مينيستر باستاۋىش سىنىپتاردا باعالاۋ تاسىلدەرى جاڭارتىلعانىن دا اتاپ ءوتتى.

- اتاپ ايتقاندا، ءبولىم بويىنشا جيىنتىق باعالاۋ جانە توقسان بويىنشا جيىنتىق باعالاۋ الىنىپ تاستالدى. كۇندەلىكتى باعالاۋدىڭ ءرولى كۇشەيتىلدى. ديكتانتتار، مازمۇنداما، شىعارما، جوبالار، اۋىزشا جانە پراكتيكالىق جۇمىستار سەكىلدى باعالاۋ ادىستەرىن مۇعالىم ءوزى تاڭداپ، ارالىق باقىلاۋ فورماسى رەتىندە جۇزەگە اسىراتىن بولادى، - دەدى ول.