جاڭا تۋعان نارەستەلەردە كەزدەسەتىن سارعىشتانۋ قاۋىپتى مە؟
كۇز، قىس ايلارىندا دۇنيەگە كەلگەن بالالاردا ءجيى كەزدەسەتىن سارعىشتانۋدىڭ سەبەپتەرى نەدە؟ بۇل سۇراققا Jibek joly تەلەارناسىنداعى «ءبىزدىڭ دارىگەر» باعدارلاماسىنا كەلگەن پەدياتر مەرەكە تۇڭعىشبايەۆا مەن بالالار ينفەتسيونيستى ءاليا جولدىبايەۆا جاۋاپ بەردى.
نارەستەلەردىڭ سارعىشتانۋى - قاندا بيليرۋبين دەڭگەيىنىڭ كوتەرىلۋىمەن جۇرەتىن جاعداي. بيليرۋبين - ەريتروتسيتتەردىڭ بۇزىلۋىنان پايدا بولاتىن سارى دەنەشىك. قاندا بيليرۋبيننىڭ جوعارى دەڭگەيى كەزىندە تەرى جانە شىرىشتى قاباتتار سارى تۇسكە بويالادى. نەگىزىنەن نارەستەلەردىڭ سارعىشتانۋى فيزيولوگيالىق جانە پاتولوگيالىق سەبەپتەرگە بايلانىستى بولادى. فيزيولوگيالىق سارعايۋ جاڭا تۋعان نارەستەلەردىڭ شامامەن %70 دا كەزدەسەدى، ول 3-4 كۇننەن كەيدە 10 كۇننەن سوڭ وزدىگىنەن كەتەدى.
سارعىش تانۋدىڭ 5 دەڭگەيى بولادى. سونىڭ ىشىندە پاتولوگيالىق سارعايۋ اۋىر جاعدايدا وتەدى جانە ناۋقاس بالا دارىگەرلەردىڭ قاتاڭ باقىلاۋىندا بولادى. سەبەبى قانداعى بيليرۋبيننىڭ ادەتتەن تىس جوعارى دەڭگەيى جاڭا تۋعان نارەستەنىڭ ميىنىڭ زاقىمدالۋ قاۋپىن تۋدىرۋى مۇمكىن. نارەستەنىڭ سارعايۋىن تەكسەرۋ ءۇشىن ونىڭ ماڭدايىن نەمەسە مۇرنىن اقىرىن باسىپ قاراۋعا بولادى. ەگەر باسقان جەردە نارەستەنىڭ تەرىسى سارى بولىپ كورىنسە، ءسىزدىڭ بالاڭىزدا جەڭىل سارعايۋ بولۋى مۇمكىن.
ەسكەرتەتىن جايت پەرزەنتحانادان شىققان سوڭ بالاڭىزدىڭ تەرىسى اسىرەسە الاقانى مەن تابانى سارعايسا بىردەن دارىگەر شاقىرتىڭىز.
سارعىش تانۋدىڭ ەمى - فوتوتەراپيا. بۇل كەزدە نارەستە ارنايى جاساندى جارىق تۇسىرەتىن لامپا استىندا جاتادى. سيرەك جاعدايلاردا نارەستەگە تامىرىشىلىك سۇيىقتىق ەنگىزۋ قاجەت بولادى.
