جاڭا سيفرلىق قۇجات ىسكە قوسىلدى. اتا-انالار نە بىلۋگە ءتيىس؟

وقۋ-اعارتۋ مينيسترلىگى سيفرلاندىرۋ دەپارتامەنتى ديرەكتورىنىڭ ورىنباسارى مايرا مارالبايەۆا ەلىمىزدە جاڭا سيفرلىق قۇجات ىسكە قوسىلعانىن، ەندى اتا-انالارعا مەكتەپتەن قاعاز تۇرىندە انىقتاما الۋدىڭ كەرەگى جوق ەكەنىن ايتتى.

ۆەدومستۆو وكىلىنىڭ سوزىنشە، 2023-جىلعى 27- جەلتوقساننان باستاپ وقۋ ورنىنان قاعاز تۇرىندەگى انىقتامالاردى تالاپ ەتۋ جانە الۋ توقتاتىلعان.

«eGov mobile موبيلدى قوسىمشاسىندا «ءبىلىم تۋرالى اقپارات» اتتى جاڭا سيفرلىق قۇجات ىسكە قوسىلدى. ونى eGov قوسىمشاسى ورناتىلعان سمارتفون ارقىلى پايدالانۋعا بولادى. بارلىق اقپارات eGov mobile قوسىمشاسى سيفرلىق قۇجاتتار وتباسى بولىمىندە قولجەتىمدى. بۇل قۇجات بالاڭىزدىڭ بالاباقشاعا باراتىنىن نەمەسە مەكتەپتە، كوللەدجدە وقيتىنىن راستايدى. ءبىلىم تۋرالى اقپاراتتا بالانىڭ تەگى، اتى، اكەسىنىڭ اتى، جەكە يدەنتيفيكاتسيالىق ءنومىرى (ج س ن/ي ي ن) تۋعان كۇنى، ءبىلىم بەرۋ ۇيىمىنىڭ اتاۋى مەن مەكەنجايى، جاس توبى، بالاباقشاداعى توبىنىڭ اتاۋى نەمەسە مەكتەپتەگى سىنىبى، كوللەدج ءۇشىن توپ كودى كورسەتىلەدى. ەندى اتا-انالارعا وقۋ ورنىنان قاعاز تۇرىندەگى انىقتاما الۋدىڭ قاجەتى جوق. ولار جەكە كۋالىك سەكىلدى eGov mobile قوسىمشاسىنان ءبىلىم تۋرالى اقپاراتتى ۇسىنسا جەتكىلىكتى»، - دەدى ديرەكتوردىڭ ورىنباسارى.

سونداي-اق، مايرا مارالبايەۆا ديپلوم دا سيفرلىق فورماتتا بەرىلەتىنىن ەسكە سالدى.

«وسىعان دەيىن وقۋ-اعارتۋ مينيسترلىگى جانە سيفرلىق دامۋ، يننوۆاتسيالار، اەروعارىش ونەركاسىبى مينيسترلىگى «تالداۋ» ۇلتتىق زەرتتەۋلەر جانە ءبىلىمدى باعالاۋ ورتالىعى» ا ق جانە «ۇلتتىق اقپاراتتىق تەحنولوگيالار» ا ق- مەن بىرلەسىپ، تەحنيكالىق جانە كاسىپتىك ءبىلىم تۋرالى ديپلومداردى سيفرلىق فورماتتا بەرۋ بويىنشا جۇمىستى اتقارعان. ولار دا موبيلدى قوسىمشادا قولجەتىمدى ەكەنىن نازارلارىڭىزعا سالامىز»، - دەدى ول.