جاڭا سالىق كودەكسىنىڭ ەسكىسىنەن قانداي ەرەكشەلىگى بار

استانا. KAZINFORM - بۇگىن Astana Open Dialogue ساراپتامالىق پلاتفورماسىنىڭ ەكىنشى وتىرىسىندا ۇلتتىق ەكونوميكا ۆيتسە-ءمينيسترى ازامات ءامرين جاڭا سالىق كودەكسىنىڭ ەسكىسىنەن قانداي ەرەكشەلىگى بار ەكەنىن ايتتى.

- بىزگە «جاڭا سالىق كودەكسىنىڭ ەسكىسىنەن قانداي ەرەكشەلىگى بار؟» دەپ جيى ساۋال قويادى. وسى جەردە قىسقاشا تۇسىندىرۋگە تىرىسايىن. ەستەرىڭىزدە بولسا، 2001، 2009، 2018-جىلدارداعى كودەكستە ورىن العان وزگەرىستەر نەگىزىنەن سالىق ساياساتىنا قاتىستى بولدى. سول ۋاقىتتا مولشەرلەمەلەر وزگەرتىلىپ، ق ق س 20 دان 12 پايىزعا، كورپوراتيۆتىك تابىس سالىعى 30 دان 20 پايىزعا تومەندەتىلدى. جەر قويناۋىن پايدالانۋشىلار سالىعى ارتىپ، شاعىن جانە ورتا بيزنەسكە ارناۋلى سالىق رەجيم وزگەرتىلدى. بۇل وزگەرتۋلەر ءاربىر سالىق كودەكسىندە بولدى. ءبىراق، وسى جىلعى وزگەرىستەر، نەگىزگى باسىمدىق - بۇل سالىقتىق اكىمشىلەۋ. وسى سالىق كودەكسىندە ءبىز نەگىزىنەن سالىقتىق اكىمشىلەۋ وزگەرىستەرىن ەنگىزىپ وتىرمىز، - دەدى ۆيتسە-مينيستر.

ونىڭ اتاپ وتۋىنشە، سەرۆيستىك مودەل ەنگىزىلەدى. ياعني، سالىق تولەۋشى تىركەلگەن ساتتەن باستاپ جابىلعانعا دەيىن سالىق ورگاندارىنىڭ سۇيەمەلدەۋىنە يە بولادى. سونىمەن قاتار، سالىق ورگاندارى مەن سالىق تولەۋشىلەردىڭ اراسىنداعى جاڭا ءوزارا قارىم-قاتىناس تا قاراستىرىلىپ جاتىر.

- وسىلار نەگىزگى وزگەرىستەر بولماق. ارينە، بىزدە سالىقتاردى قىسقارتۋعا، جەڭىلدىكتەردى جويۋعا جانە ارناۋلى سالىق رەجيمدەرىن جاقسارتۋعا قاتىستى جەكە تاپسىرما بولدى. مۇنىڭ ءبارى سالىق كودەكسىندە، جوباسىندا كورىنىس تاپقان. مۇنى قازىرگى ۋاقىتتا ءماجىلىس الاڭىندا تالقىلاپ جاتىرمىز، - دەدى ازامات ءامرين.

ايتا كەتەيىك، بۇعان دەيىن جاڭا سالىق كودەكسى جوباسىنا سايكەس ەسكى كولىك سالىعى %50 عا تومەندەيتىنى ءمالىم بولدى.