جاڭا رەفورمالار، 20 ميلليون حالىق - پرەزيدەنت 2023-جىلدى قورىتىندىلادى
2023-جىل - قازاقستان ءۇشىن تابىسى مەن تاۋقىمەتى قاتار كەلگەن جىل بولدى. بۇل تۋرالى مەملەكەت باسشىسى قاسىم-جومارت توقايەۆ جاڭاجىلدىق بەينەقۇتتىقتاۋىندا ايتتى، دەپ حابارلايدى Kazinform.
«قادىرلى وتانداستار! ءبارىمىز ءبىر ەل بولىپ، جاڭا جىلدى قارسى الىپ وتىرمىز. بارشامىز ەسكى جىلدى وي ەلەگىنەن وتكىزەمىز، الداعى جىلعا جوسپار جاساپ، جاڭا ماقسات قويامىز. ءبىز وسى ساتتە ءبىر-بىرىمىزگە اق تىلەگىمىزدى ارنايمىز، سىي- قۇرمەت كورسەتەمىز. قاسيەتتى وتانىمىزدىڭ بەرەكەلى بىرلىگى جۇرتىمىزدىڭ وسىنداي تاتۋ تىرلىگىنەن باستالادى»، - دەدى پرەزيدەنت قۇتتىقاۋ لەبىزىندە.
مەملەكەت باسشىسى 2023-جىلى قازاقستان ءۇشىن تابىسى مەن تاۋقىمەتى قاتار كەلگەنىن اتاپ ءوتتى.
«ومىردە قۋانىش پەن قيىندىقتىڭ الما-كەزەك بولۋى - زاڭدىلىق. ءبىراق، ءبىز ەڭسەمىزدى تىك ۇستاپ، كەلەشەككە ءاردايىم سەنىممەن قارايمىز. بيىل جۇرتىمىز جاڭا جىلدى كوپتەن كۇتكەن جاعىمدى جاڭالىقپەن قارسى الۋدا. جاقىندا حالقىمىزدىڭ سانى 20 ميلليونعا جەتتى. ەلىمىز ءۇشىن بۇل اق تۇيەنىڭ قارنى جارىلعان كۇن بولدى. حالىق سانىنىڭ ءوسۋى - مىقتى مەملەكەت بولۋدىڭ جانە وركەندەۋدىڭ كەپىلى. ال، باقىتتى وتباسى - باقۋاتتى ەلدىڭ ارقاۋى»، - دەدى قاسىم-جومارت توقايەۆ.
پرەزيدەنت ايتقانداي، قازاقستان ستراتەگيالىق باعدارى ايقىن ەل رەتىندە تۇراقتى دامىپ كەلەدى.
«ءبىز ىنتىماق-بىرلىكتىڭ جانە قاجىرلى ەڭبەكتىڭ ارقاسىندا اۋقىمدى ءىس-شارالار اتقاردىق. جاڭارۋ مەن جاڭعىرۋ جولىنداعى ماڭىزدى رەفورمالاردى جۇزەگە اسىردىق. وسىلايشا، مەملەكەتتىگىمىزدىڭ تۇعىرىن بەكەمدەي تۇستىك. زاڭ مەن ءتارتىپ ۇستەمدىگىن ورناتۋدى مەملەكەتتىك ساياساتتىڭ نەگىزگى باعدارى دەپ جاريالادىق. وسى باعىتتا ناقتى شارالاردى قابىلداۋعا كىرىستىك. ءبىلىم بەرۋ جانە دەنساۋلىق ساقتاۋ سالاسىندا اۋقىمدى جوبالاردى قولعا الدىق»، - دەدى پرەزيدەنت.
ەلىمىز ادىلدىككە نەگىزدەلگەن جاڭا ەكونوميكالىق ۇلگىگە كوشە باستادى. بۇل حالىقتىڭ تۇرمىس ساپاسىن جاقسارتۋ ءۇشىن اسا ماڭىزدى قادام بولدى.
شەتەلدەن ميللياردتاعان دوللار ينۆەستيتسيا تارتىلدى. سونىڭ ارقاسىندا ەلگە اسا قاجەت وندىرىستەر اشىلدى. جۇمىس ورىندارى پايدا بولدى.
ەل ەكونوميكاسىنىڭ باستى قوزعاۋشى كۇشى رەتىندە شاعىن جانە ورتا بيزنەسكە جان-جاقتى قولداۋ كورسەتىلەتىن بولدى.
«زاڭسىز الىنعان ەكونوميكالىق اكتيۆتەردى ەلگە قايتارۋ جۇمىسى دا جالعاسۋدا. مەملەكەتكە قايتارىلعان قارجى كوپ ۇزاماي حالىقتىڭ يگىلىگىنە جۇمسالاتىن بولدى، ياعني مەكتەپتەر سالىنا باستادى. جىلدار بويى يگەرىلمەي كەلگەن ميلليونداعان گەكتار جەر ادال شارۋالارعا بەرىلەتىن بولدى»، - دەپ قورىتىندىلادى مەملەكەت باسشىسى.
