جاڭا قۇرىلىس كودەكسى: جوسپارلى ينسپەكتسيالاۋ تەتىگى ەنگىزىلمەك
استانا. KAZINORM - مەملەكەتتىك ساۋلەت-قۇرىلىس باقىلاۋ ورگاندارىنا زاڭ بۇزۋشىلىق ورىن العان قۇرىلىس نىسانىنداعى جۇمىستاردى توقتاتۋ قۇقىعى بەرىلمەك.
بۇل تۋرالى بۇگىن ماجىلىستە جاڭا قۇرىلىس كودەكسىن تالقىلاۋعا ارنالعان ساراپشىلىق كەزدەسۋدە ونەركاسىپ جانە قۇرىلىس ۆيتسە-ءمينيسترى تيمۋر قاراعويشين ايتتى.
«جەدەل دەن قويۋ شاراسىن ەنگىزۋ - بۇل قۇرىلىستى باقىلاۋدىڭ جاڭا نىسانى، ول انىقتالعان زاڭ بۇزۋشىلىقتارعا جەدەل دەن قويۋدان تۇرادى. بۇل مەحانيزم مەملەكەتتىك ساۋلەت- قۇرىلىس باقىلاۋ ورگاندارىنا زاڭ بۇزۋشىلىقتارعا ۋاقتىلى دەن قويۋعا مۇمكىندىك بەرەدى. ورەسكەل زاڭ بۇزۋشىلىقتار انىقتالعان كەزدە ول جويىلعانعا دەيىن قۇرىلىستى توقتاتا تۇرۋ مۇمكىندىگى بولادى. بۇل رەتتە، تەكسەرۋ سۋبەكتىسىنە بارۋدان باسقا، اتالعان شارا اقپاراتتىق جۇيەلەر مونيتورينگىنىڭ ناتيجەلەرى بويىنشا دا قولدانىلاتىن بولادى. جالپى، بۇل مەحانيزم قۇرىلىس ساپاسىن ارتتىرۋعا مۇمكىندىك بەرەدى جانە قۇرىلىس كومپانيالارىنىڭ جۇمىسىنا ساپالى باقىلاۋ جۇرگىزۋدى قامتاماسىز ەتەدى دەپ سانايمىز»، - دەدى تيمۋر قاراعويشين.
ونىڭ اتاپ وتۋىنشە، «جوسپارلى ينسپەكتسيالاۋ» تەتىگىن ەنگىزىلەدى. سالىنعان وبەكتىلەردى قابىلداۋعا مەملەكەت اتىنان مەملەكەتتىك ساۋلەت-قۇرىلىس باقىلاۋ جانە توتەنشە جاعدايلار ورگاندارى قاتىسادى.
«جوسپارلى ينسپەكتسيالاۋ قۇرىلىسقا تاپسىرىس بەرۋشىنىڭ ءوزى جاساعان جانە قۇرىلىس-مونتاجداۋ جۇمىستارىنىڭ باستالعانى تۋرالى حابارلامامەن بىرگە بەرىلگەن كەستە بويىنشا مەملەكەت تاراپىنان تەكسەرۋدى جۇزەگە اسىرۋدى بىلدىرەدى. ينسپەكتسيالاۋ جوسپارى بولعان كەزدە مەملەكەتتىك ساۋلەت-قۇرىلىس باقىلاۋ ورگاندارى ينسپەكتورلارىنىڭ قۇرىلىس نىسانىنا تەكسەرىسكە شىعۋى بارلىق كەزەڭ ىشىندە كەستەگە سايكەس جۇزەگە اسىرىلاتىن بولادى. بۇل رەتتە مەملەكەتتىك ساۋلەت- قۇرىلىس باقىلاۋ ورگاندارى ورىندالعان جۇمىستاردىڭ ساپاسى تۋرالى قورىتىندىنى قۇرىلىس نىسانىنا شىقپاي- اق كەلىسەدى. ينسپەكتسيالاۋ جوسپارى بولماعان كەزدە ورىندالعان جۇمىستاردىڭ ساپاسى تۋرالى قورىتىندىنى كەلىسۋ ءراسىمى قۇرىلىس نىسانىنا بارىپ جانە جۇرگىزىلگەن قۇرىلىس- مونتاجداۋ جۇمىستارىنىڭ ساپاسىن تەكسەرۋ بويىنشا بارلىق قاجەتتى شارانى جۇرگىزە وتىرىپ جۇزەگە اسىرىلادى»، - دەدى ۆيتسە- مينيستر.
