جاڭا ۇكىمەت ماڭىزدى شەشىمدەردى شۇعىل قابىلداۋى كەرەك - توقايەۆ
استانا. KAZINFORM - پرەزيدەنت قاسىم-جومارت توقايەۆ ءماجىلىستىڭ جالپى وتىرىسىندا جاڭادان جاساقتالاتىن ۇكىمەتكە جاڭا قارقىنمەن جۇمىس ىستەۋ قاجەت ەكەنىن ايتتى.
«الدىمەن ەلىمىزدىڭ الەۋمەتتىك-ەكونوميكالىق ساياساتىنا جاڭا سەرپىن بەرۋ كەرەك. ياعني، ەكونوميكانىڭ بارلىق سالاسىن دامىتۋ، ىنتالاندىرۋ جولدارى مەن الدىن الا مىندەتتەردى قايتا قاراۋ قاجەت. تۇپتەپ كەلگەندە، مەملەكەت ەندى ۇزدىكسىز قولداۋ شارالارىنان ناعىز ساپالى دامۋعا قولعابىس ەتۋ ىسىنە تۇبەگەيلى كوشۋ كەرەك. بۇل جۇمىستى ءسوز جۇزىندە ەمەس، ءىس جۇزىندە ورىندايتىن ۋاقىت جەتتى. وسىلايشا ءبىز وزىق دامۋ جولىنا ءتۇسىپ، ۇلتتىق ەكونوميكانى شىن مانىندە جاڭا دەڭگەيگە شىعارامىز. قازىر ەلىمىزدىڭ سالىق جانە بيۋجەت كودەكستەرى مەملەكەتتىك ساتىپ الۋ جانە مەملەكەت پەن جەكە مەنشىك ارىپتەستىگى تۋرالى زاڭنامالار مۇلدە جاڭاشا سيپاتقا يە بولدى. سونىڭ ءبارى مەن جاريالاعان جاڭا ەكونوميكالىق ساياساتتى جۇزەگە اسىرۋدىڭ مىقتى تىرەگى بولۋعا ءتيىس»، - دەدى قاسىم-جومارت توقايەۆ.
پرەزيدەنت جاڭا ۇكىمەت شۇعىل شەشۋگە ءتيىس نەگىزگى شارۋالاردىڭ ءبىرقاتارىنا توقتالدى.
«سونىمەن قاتار، الدىمىزدا تاريف ساياساتىنداعى كەدەرگىلەردى جويۋ، اگروسەكتوردى قايتا جانداندىرۋ الەۋمەتتىك سالانى باسقارۋ مەن قارجىلاندىرۋدىڭ ءتيىمدى تاسىلدەرىن ازىرلەۋ مىندەتى تۇر. بۇل جەردە، ارينە، ەڭ الدىمەن ۇكىمەت ماڭىزدى ءرول اتقارۋعا ءتيىس. جاڭا قارقىنمەن جۇمىس ىستەۋ قاجەت. ماڭىزدى شەشىمدەردى شۇعىل قابىلداپ، كوپ سوزباي شەشۋشى قادامداردى جاساۋ كەرەك»، - دەدى مەملەكەت باسشىسى.
ايتا كەتەيىك، كەشە مەملەكەت باسشىسى ۇكىمەتتى وتستاۆكاعا جىبەردى.
پرەزيدەنت كەڭەسشىسى - باسپا ءسوز حاتشىسى بەرىك ءۋالي ۇكىمەت باسشىسىن تاعايىنداۋ ءراسىمىن ءتۇسىندىردى.
بۇگىن ەلىمىزدىڭ جاڭا پرەمەر-ءمينيسترى تاعايىندالدى.
