جاڭا كەلىسىم بوسقىندار ماسەلەسىن شەشە مە؟

لوندون زاڭسىز ميگرانتتارعا قارسى كۇرەستە بەرىلگىسى جوق. ۇلى بريتانيا بوسقىنداردى دەپورتاتسيالاۋ تۋرالى كەلىسىمنىڭ جاڭا نۇسقاسىن دايىنداپ، رۋاندامەن ورتاق مامىلەگە كەلدى.

بۇعان دەيىن جوعارعى سوتتا جەڭىلىس تاۋىپ، بوسقىنداردى افريكا ەلىنە جىبەرە الماعان ۇكىمەت باسشىسى ريشي سۋناك توتەنشە جاعداي تۋرالى زاڭ ارقىلى رۋاندانى قاۋىپسىز مەملەكەت دەپ جاريالاماق، دەپ حابارلايدى Kazinform ءتىلشىسى.

كەلىسىمنىڭ جاڭارتىلعان نۇسقاسىندا ۇلى بريتانيادان رۋانداعا جەر اۋدارىلعان زاڭسىز ميگرانتتار قۋعىن-سۇرگىنگە ۇشىراپ، كەلگەن ەلىنە قايتا جىبەرىلمەيدى دەلىنگەن. ءدال وسى ماسەلە ۇلى بريتانيانىڭ جوعارعى سوتىن قاتتى مازالاعان بولاتىن. ول ءۇش اپتا بۇرىن كەلىسىم-شارتتىڭ بۇرىنعى نۇسقاسىن زاڭسىز دەپ ساناپ، قابىلداماي تاستاعان ەدى. ەندى ماسەلە شەشىمىن تاپقان سياقتى. وسىلايشا بريتان بيلىگى لا مانش بۇعازى ارقىلى رەزەڭكە قايىقپەن كەلەتىندەرگە توسقاۋىل قويامىز دەپ بەكىنىپ وتىر.

«ءبىز زاڭسىز ادام تاسىمالىمەن اينالىساتىن كونتراباندالىق توپتاردىڭ بيزنەسىن بۇعاتتايمىز. بوسقىنداردىڭ رۋاندادا قاۋىپسىز ءومىر سۇرە الاتىنىنا ەل ۇكىمەتى كەپىلدىك بەرىپ وتىر»، - دەيدى ۇلى بريتانيانىڭ ىشكى ىستەر ءمينيسترى دجەيمس كليەۆەرلي.

سايلاۋ جاقىنداعان سايىن كونسەرۆاتورلاردان مازا قاشتى. بيلىك پارتياسى ەلدە زاڭدى جۇرگەندەردىڭ دە سانىن ازايتامىز دەپ حالىققا ۋادە بەرگەن بولاتىن. ءبىراق ستاتيستيكا باسقاشا: بيىل 700 مىڭعا جۋىق يمميگرانت ۇلىبريتانياعا تابان تىرەپ، رەكورد ورناتقان. ولاردىڭ كوپشىلىگى ەۋروپالىق وداق ەلدەرىنەن ەمەس، ءۇندىستان، نيگەريا، قىتاي، پاكىستاننان كەلگەندەر. ارالارىندا ستۋدەنتتەر مەن جۇمىس بابىمەن جۇرگەندەر كوپ. بيلىك ولارمەن دە كۇرەستى كۇشەيتكەلى وتىر.

«ءبىز بريتان حالقىنىڭ جالاقىسىن تومەندەتۋگە سەبەپشى بولىپ جۇرگەن زاڭدى ميگرانتتاردىڭ دا سانىن ازايتامىز. بىلىكتى مامانداردى تارتۋ ءۇشىن جۇمىس بەرۋشىلەر كەلەسى كوكتەمنەن باستاپ، قىزمەتكەرلەرىنە جىلىنا 38700 ستەرلينگ فۋنتىن تولەۋى كەرەك بولادى. سونداي-اق ستۋدەنتتەرگە وتباسىلارىن الىپ كەلۋگە توسقاۋىل قويامىز. ناتيجەسىندە كەلەر جىلى وتكەن جىلمەن سالىستىرعاندا ميگرانتتاردىڭ سانى شامامەن 300000 عا كەمىمەك»، - دەيدى ۇلى بريتانيانىڭ ىشكى ىستەر ءمينيسترى دجەيمس كليەۆەرلي.

وپپوزيتسيا ۇكىمەتتى اقشانى دالاعا شاشىپ جاتىر دەپ ايىپتادى. كونسەرۆاتورلار جاڭا كەلىسىمدى بۇگە-شۇگەسىنە دەيىن وقىمادى-مىس. «رۋانداعا تولەنەتىن 140 ميلليون ستەرلينگ فۋنتىنىڭ ەش قايتارىمى جوق»، دەدى لەيبوريستەر پارتياسىنىڭ كوشباسشىسى.

«ءبىز جاڭا كەلىسىمگە سايكەس ميگرانتتاردى جەر اۋدارعاننان كەيىن ولاردىڭ ءجۇرىپ-تۇرۋى مەن اس-اۋقاتى ءۇشىن بەس جىل تولەپ وتىرۋىمىز كەرەك. بۇعان قوسا، رۋانداعا جىبەرىلگەن كەز-كەلگەن ادام قىلمىس جاساعان جاعدايدا ەلگە قايتارىلۋى مۇمكىن. بۇل اقپاراتتى بۇگىن مينيسترلەرىڭىز راستادى»، - دەيدى لەيبوريستەر پارتياسىنىڭ كوشباسشىسى كير ستارمەر.

باسى داۋعا قالىپ، بيلىكتەن قۋىلعان بۇرىنعى ىشكى ىستەر ءمينيسترى ۇلى بريتانيا پارلامەنتىنىڭ قاۋىمدار پالاتاسىندا توبە كورسەتتى. سۋەللا براۆەرماننىڭ پىكىرىنشە، قايىقتار توقتاتىلماسا، توريلەر حالىقتىڭ نازارىنان تىس قالىپ، سايلاۋدا جەڭىلىسكە ۇشىرايدى.

«جوعارعى سوتتا جەڭىلگەننەن كەيىن پرەمەر-مينيستر توتەنشە زاڭ ەنگىزۋگە كەلىستى. مەن ونىڭ شەشىمىن قۇپتايمىن. ءبىراق بۇل شەشىم شىققالى بەرى ءۇش اپتا ءوتتى. زاڭ جوباسىن ءالى كورگەن جوقپىز. ماعان ونى جاريالاۋ كۇنى جاقىن ەكەنىن ايتتى، ءبىراق بىزدە ۋاقىت از. بۇل توتەنشە زاڭ جوباسىمەن ءبىز ءقازىر تانىسۋىمىز كەرەك»، - دەيدى بريتان پارلامەنتىنىڭ مۇشەسى سۋەللا براۆەرمان.

جوعارعى سوتتىڭ شەشىمىن جوققا شىعاراتىن توتەنشە زاڭ قابىلدانعان جاعدايدا پارلامەنت پەن سوتتىڭ اراسىندا بۇرىن-سوڭدى بولماعان كونستيتۋتسيالىق تەكەتىرەس تۋۋى مۇمكىن. ۇكىمەت ەلدىڭ ەڭ مىقتى زاڭگەرلەرىمەن سوتتاسىپ جۇرگەندە سايلاۋ وتەتىن كۇن دە جاقىنداپ، توريلەردىڭ اقىر اياعىندا بيلىكتەن كەتپەسىنە كىم كەپىل، دەيدى ساراپشىلار.