جاڭا جىلدىق مەرەكە كۇندەرى قالاي دۇرىس تاماقتانۋ كەرەك - دارىگەر كەڭەسى
الماتى قالالىق N36 قالالىق ەمحانانىڭ دارىگەرى ايدانا بايسەيىتوۆا جاڭا جىل مەرەكەسىندە دۇرىس تاماقتانۋدىڭ ماڭىزدىلىعى جايىندا Kazinform تىلشىسىنە ايتىپ بەردى.
دارىگەر ەڭ الدىمەن دۇرىس تاماقتانۋدىڭ قاعيدالارىن ەستە ۇستاۋ كەرەك ەكەنىن اتاپ ءوتتى. ياعني، ءتاتتى ءارى مايلى تاعامداردى تۇتىنۋدى شەكتەگەن دۇرىس، جەڭىل سىڭەتىن اقۋىز ونىمىنە (قۇس ەتى، مايدىڭ تومەن پايىزى بار ءسۇت ءونىمى) باسىمدىق بەرگەن دۇرىس دەيدى.
ايدانا بايسەيىتوۆا سونداي- اق بالىق، ەت تاعامدارىن كوكونىسپەن، سالاتتى وسىمدىك مايى نەمەسە ليمون شىرىنى قوسىلعان دامدەۋىشتەرمەن ارالاستىرۋدى ۇسىندى.
«كۇردەلى كومىرسۋ، ماي مەن اقۋىزدى ارالاستىرماۋعا تىرىسىڭىز. مىسالى، ەتتى ءشوپ جانە كوكونىسپەن جەگەن دۇرىس، ال كارتوپتى كەيىنگە قالدىرعان ءجون. ءتۇرلى تورت، كەكس جانە پيروجنىيدى مازىرگە قوسپاڭىز. سەبەبى، ولاردىڭ قۇرامىندا قانت پەن ماي كوپ. ولاردا جوعارى كالوريا بولادى. وعان قاراعاندا بيسكۆيت پەن قاتپارلى ونىمدەردىڭ زيانى از ءارى مەرەكەلىك داستارقانعا كوبىرەك ۇيلەسەدى»، - دەيدى دارىگەر.
اتالعان مامان اسىرەسە اسقازان- ىشەك جولدارىنىڭ سوزىلمالى اۋرۋى بار ادامدارعا دەنساۋلىعىنا ەرەكشە ءمان بەرگەنى ءجون ەكەنىن ايتتى. بۇل رەتتە مەرەكەلىك داستارقان ءوت قابىنا دا اسەر ەتۋى مۇمكىن. مىسالى، حولەستەرينگە باي تاعامدى تۇتىنۋ ءوت قابىنىڭ دۇرىس جۇمىس ىستەمەۋىنە اكەلەدى. تاماقتى قورىتۋعا قاجەتتى ءوت تۇرىپ قالعان جاعدايدا، ءوت قابىنىڭ تۇبىنە كريستالدار جينالىپ، تاستار پايدا بولادى.
«سۇيىكتى مازىرىڭىزدە زياندى ينگرەديەنتتەر بولسا، ولاردى پايدالى تاعامعا اۋىستىرعان دۇرىس. ماسەلەن، سارى مايدى ءزايتۇن مايىنا، قانتتى بالعا نەمەسە تابيعي ءتاتتى دامدەۋىشپەن الماستىرىڭىز. بۇل قاجەتسىز كالوريانى ازايتۋعا جانە تاماقتىڭ تاعامدىق قۇندىلىعىن ارتتىرۋعا كومەكتەسەدى. سونداي- اق تاعامنىڭ دايىندالۋىنا نازار اۋدارىڭىز. دۇرىس ءپىسىرۋ ءادىسىن تاڭداساڭىز، مەرەكەلىك تاعام دەنساۋلىق ءۇشىن پايدالى دا بولادى. قۋىرۋعا قاراعاندا، پىسىرۋگە ارتىقشىلىق بەرىڭىز. وسىلايشا ءسىز ماي مەن كالوريانى كوپ قوسپاي- اق كوپ قورەكتىك زاتتى ساقتاي الاسىز»، - دەيدى ايدانا بايسەيىتوۆا.
ءسوز سوڭىندا ول دەنە بەلسەندىلىگى مەن ۇنەمى سۋ ءىشىپ ءجۇرۋدىڭ ماڭىزدىلىعىن ايتتى.
«سۋ دەنەڭىزدى ىلعالداندىرۋعا جانە ونى جاقسى كۇيدە ۇستاۋعا، ال دەنە بەلسەندىلىگى زاتتاردىڭ الماسۋىن ارتتىرۋعا جانە قوسىمشا كالوريادان ارىلتۋعا كومەكتەسەدى»، - دەپ اتاپ ءوتتى الماتى قالالىق N36 قالالىق ەمحانانىڭ دارىگەرى ا. بايسەيىتوۆا.
