جاڭا جىلدان كەيىن پاتەر قىمباتتاي ما - ساراپشى پىكىرى

استانا. KAZINFORM - قازاقستاندىقتارعا باسپانا جالداۋ كەلىسىمشارتتارىن ونلاين جاساۋ مۇمكىندىگىن ۇسىنۋ قاجەت. «قازاقستان تۇرعىن ءۇي كومپانياسى» اكسيونەرلىك قوعامىنىڭ باسقارما ءتوراعاسى التاي كۇزدىبايەۆ باسپانا نارىعىنداعى زاڭسىزدىقتاردى رەتتەۋدىڭ ءبىر جولى وسى دەپ وتىر.

«حالىق اراسىندا «جاڭا جىلعا دەيىن پاتەر ساتىپ ۇلگەرىپ قالۋ كەرەك. 1-قاڭتاردان باستاپ باسپانا باعاسى قىمباتتايدى ەكەن»، - دەيتىن اڭگىمە كوپ ايتىلىپ كەتتى. ونىڭ ۇستىنە سالىق كودەكسىندەگى قوسىلعان قۇن سالىعى قۇرىلىس كومپانيالارىنا دا قاتىستى بولاتىنى، ال بۇل ءۇي باعاسىنا تىكەلەي اسەر ەتەتىنى ايتىلىپ ءجۇر. «قازاقستان تۇرعىن ءۇي كومپانياسى» ا ق باسقارما ءتوراعاسى ولجاس سالىقوۆتان وسىنداي سۇراقتارمەن باسى قاتىپ جۇرگەن قازاقستاندىقتارعا قانداي كەڭەس بەرەتىنىن سۇرادىق.

ساراپشى مۇنداي بايبالام اڭگىمەنىڭ مەملەكەتتىك باعدارلامالار ارقىلى سالىناتىن ۇيلەرگە قاتىسى جوق ەكەنىن ايتادى.

«ءبىرىنشى كەزەكتە تۇرعىن ءۇي قۇرىلىسىنىڭ مەملەكەتتىك باعدارلاماسىندا بۇكىل باعالار بەكىتىلگەنىن ەسكەرۋ كەرەك. ونەركاسىپ جانە قۇرىلىس مينيسترلىگى وكىلەتتى ورگان رەتىندە ول باعالاردى ايقىنداپ بەرگەن. مۇنداي شارالار باسپانا جالداۋ اقىسىن، يپوتەكا تولەگەن كەزدە الەۋمەتتىك تۇرعىدان از قامتىلعان حالىقتىڭ قالتاسىنا جۇك تۇسپەسىن دەپ قابىلدانعان. سوندىقتان، باسپانا باعاسى تۋرالى ايتقاندا مەملەكەتتىك باعدارلامالار ارقىلى سالىنىپ جاتقان ۇيلەردىڭ باعاسىنىڭ وسەتىنىن كۇتىپ وتىرعان جوقپىز. ياعني، بۇكىل باعا بەكىتىلگەن. ءتىپتى قۇقىقتىق اكتىلەرمەن رەگلامەنتتەلگەن. سايكەسىنشە بۇل جەردە تاۋەكەلدەر كورىپ وتىرعان جوقپىز»، - دەيدى ول.

«ق ت ك» ا ق وكىلى كوممەرتسيالىق باسپانا باعاسىنا بايلانىستى بولجام ايتا المايتىنىن جەتكىزدى.

«كوممەرتسيالىق باسپانا باعاسىن سۇرانىس پەن ۇسىنىستىڭ قاتىناسى رەتتەيتىنىن ءوزىڭىز دە بىلەسىز. مەملەكەت وعان قاتىسپايدى. ارينە، قۇرىلىستىڭ وزىندىك قۇنىنا اسەر ەتەتىن ماتەريالدىڭ باعاسى، ينفلياتسيا سياقتى فاكتورلاردى ەسەپكە الۋ كەرەك. ازاماتتاردىڭ ساتىپ الۋ قابىلەتى دە باعاعا اسەر ەتەدى. بۇل ماسەلەدە اركىم ءوز شاماسىنا قاراپ شەشىم قابىلداعان دۇرىس دەپ ويلايمىن»، - دەيدى ولجاس سالىقوۆ.

اۆتور
ەسىمجان ناقتىباي