جاڭا جىلدان باستاپ، زەينەتاقى جانە ەڭ تومەنگى جالاقى مولشەرى قالاي وزگەرەدى؟

ايلىق ەسەپتىك كورسەتكىش (ا ە ك) دەگەن نە؟

بۇل كورسەتكىش مىنا سەبەپتەرمەن قولدانىلادى:

جاردەماقى، زەينەتاقى جانە الەۋمەتتىك تولەم مولشەرىن ەسەپتەۋ.

سالىق جانە باسقا دا مىندەتتى تولەمدى ەسەپتەۋ.

ايىپپۇل مەن باسقا سانكسيالاردىڭ مولشەرىن انىقتاۋ.

جىل سايىن ا ە ك مولشەرى رەسپۋبليكالىق بيۋجەت تۋرالى زاڭمەن بەكىتىلەدى.

2025-جىلعى ا ە ك مولشەرى قانشا؟

2025-جىلعى 1-قاڭتاردان باستاپ قازاقستاندا ايلىق ەسەپتىك كورسەتكىش 3932 تەڭگە بولادى. 2024-جىلمەن سالىستىرعاندا ا ە ك مولشەرى 6,1 پايىزعا، 240 تەڭگەگە ءوستى.

ەڭ تومەنگى جالاقى جانە زەينەتاقى

ايلىق ەسەپتىك كورسەتكىش جىل سايىن رەسپۋبليكالىق بيۋجەت تۋرالى زاڭمەن بەكىتىلەدى. زاڭعا قازاقستان پرەزيدەنتى 2024-جىلعى 4-جەلتوقساندا قول قويدى.

ا ە ك- تەن بولەك، قۇجاتتا ەڭ تومەنگى جالاقى مولشەرى، زەينەتاقىنىڭ ەڭ تومەنگى مولشەرى، بازالىق الەۋمەتتىك تولەمدەردىڭ مولشەرىن ەسەپتەۋ ءۇشىن ەڭ تومەنگى كۇنكورىس دەڭگەيى بەكىتىلدى:

ەڭ تومەنگى جالاقى (ە ت ج) - 85000 تەڭگە.

مەملەكەتتىك بازالىق زەينەتاقى تولەمىنىڭ ەڭ تومەنگى مولشەرى - 32360 تەڭگە.

زەينەتاقىنىڭ ەڭ تومەنگى مولشەرى - 62771 تەڭگە.

ايلىق ەسەپتىك كورسەتكىش (ا ە ك) - 3932 تەڭگە.

بازالىق الەۋمەتتىك تولەمدەردى ەسەپتەۋ ءۇشىن ەڭ تومەنگى كۇنكورىس دەڭگەيىنىڭ شەگى - 46228 تەڭگە.

ەسكە سالايىق، بۇعان دەيىن 2025-جىلى قازاقستاندا قانداي تولەمدەر مەن جاردەماقىلار وسەتىنى بەلگىلى بولدى.

ۇكىمەت تە ينفلياتسياعا بايلانىستى كەلەر جىلى قازاقستاندا زەينەتاقى مەن جاردەماقى مولشەرى ارتاتىنىن مالىمدەدى.