جاڭا جىل تۇنىندە 15 اتىراۋلىق وتباسىنىڭ شىرقىن بۇزعان

اتىراۋ. KAZINFORM - اتىراۋدا جاڭا جىل تۇنىندە وتباسىنىڭ تىنىشتىعىن بۇزعان 15 ادام پوليتسياعا جەتكىزىلدى.

اتىراۋ وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنە سۇيەنسەك، بۇگىن تاڭعا دەيىن ءتارتىپ ساقشىلارىنا 205 شاقىرتۋ تۇسكەن.

- جاڭا جىل تۇنىندە پوليتسياعا 205 حابارلاما ءتۇستى. كوپشىلىك ءىس-شارا كەزىندە بالالاردىڭ اتا-انالارىنان اداسىپ قالۋ دەرەگى تىركەلمەدى. كوشەلەردە بۇزاقىلىق ارەكەتى تىركەلمەدى. الايدا وتباسىنىڭ شىرقىن بۇزعان 15 ادام انىقتالىپ، پوليتسيا بولىمدەرىنە جەتكىزىلدى. جول بويىندا 25 جول-كولىك وقيعاسى تىركەلدى، - دەپ حابارلادى دەپارتامەنتتىڭ باسپا ءسوز قىزمەتى.

اتىراۋ وبلىستىق پوليتسيا دەپارتامەنتىنىڭ باستىعى، پوليتسيا گەنەرال-مايورى نۇرحات ورازبايەۆتىڭ ايتۋىنشا، جاڭا جىل مەرەكەسىنە وراي تۇرعىنداردىڭ تىنىشتىعى مەن قوعامدىق قاۋىپسىزدىكتى قامتاماسىز ەتۋ ءۇشىن پوليتسەيلەر كۇشەيتىلگەن رەجيمدە قىزمەت اتقارۋدا.

- ءبىزدىڭ باستى ماقساتىمىز - تۇرعىنداردىڭ قاۋىپسىزدىگىن قامتاماسىز ەتۋ. ويتكەنى مەرەكە كۇندەرى جاياۋ جۇرگىنشىلەردىڭ دە، كولىكتىڭ اعىنى ارتادى. وسىعان بايلانىستى پوليتسيانىڭ جەكە قۇرامى قوعامدىق ءتارتىپتى ساقتاۋ، قالا مەن اۋىلدارداعى كوشەلەردە قۇقىق بۇزۋشىلىقتاردىڭ الدىن الۋ ماقساتىنداعى ءتيىستى جۇمىستاردى اتقارادى. پيروتەحنيكا سالدارىنان بولۋى مۇمكىن وقىس وقيعالاردى بولدىرماۋدى باستى نازاردا ۇستايدى، - دەيدى نۇرحات ورازبايەۆ.

اۆتور

جولداسبەك شوپەعۇل